पोर्चुगल : एनआरएनए नेतालाई पत्रकार महासंघको चेतावनी – ‘पत्रकारलाई धम्क्याउन बन्द गर’
प्रकाशित मिति : मंसिर १२, २०७६ बिहीबार
– हरिकृष्ण पन्थी / पोर्चुगल
पोर्चुगलको सडकमा सुत्ने दुईजना युवाको समाचारको विषयलाई लिएर एनआरएनए पोर्चुगलका अध्यक्ष तिलक गैरेले वक्तव्य जारी गरेपछि युरोपका पत्रकारहरुले त्यसको प्रतिरोध गरिरहेका छन् । नेपाल पत्रकार महासंघ युरोप शाखाका अध्यक्ष केजिन राईले वक्तब्य जारी गर्दै पत्रकारलाई धम्क्याउने काम बन्द गर्न चेतावनी दिएका छन् ।
राईले वक्तब्य जारी गर्दै भनेका छन् – ‘नेपाली पत्रकारमाथि नेपालमा मात्र नभएर युरोपमा समेत मानसिक आक्रमण हुने गरेका छन् । त्यस्तै एक मानसिक आक्रमण पोर्चुगलमा आफ्नो कार्यक्षेत्र बनाएर राष्ट्रिय समाचार समितिको प्रतिनिधि भई सुचना सम्प्रेषण गरिरहेका पत्रकार भगवान गिरीमाथि भएको छ ।’
गिरीले पोर्चुगलको नेपाली समाजबारे समाचार सम्प्रेषण गर्दा एनआरएनए पोर्चुगलका अध्यक्ष गैरेले पत्रकारमाथि अनावश्यक दवाव सृजना गर्ने उद्देश्यले वक्तब्य जारी गरेको भन्दै पत्रकार महासंघ युरोप शाखाले विरोध जनाएको छ । वक्तब्यमा भनिएको छ – ‘नेपालबाट दलालमार्फत ल्याइएका नेपालीहरु विभिन्न कारणले घरबास विहिन हुँदा समेत उनीहरुको उद्दारमा त्यहाँका कथित समाजसेवी तथा एनआरएनए त्यता केन्द्रीत हुनुको साटो समाज सेवाको आडमा गरिने मानव तस्करी र पीडित नेपालीको उद्दारको आशयसहित सडकमा जीवन विताउन बाध्य नेपालीहरुका बारेमा लेखिएको समाचारमाथि आक्रमक हुनुले झनै शंका उब्जाएको छ ।’
‘मानव तस्करी र दलालहरुको मनोवल बढाउने गरेर गरिने यसप्रकारको आक्रमणले सम्बन्धित संस्था वा व्यक्तिको शंकास्पद संलग्नतालाई ईगित गर्नेतर्फ समेत सचेत हुन सबैलाई अनुरोध गर्दछौं ।’ – वक्तब्यमा भनिएको छ ।
