आफ्नै घरमै मृत भेटिए अभिनेता दीपक क्षेत्री
प्रकाशित मिति : मंसिर २८, २०७६ शनिबार
लामो समयदेखि नेपाली चलचित्रमा सक्रीय रहेका पुराना अभिनेता दीपक क्षेत्री डिल्ली बजारस्थित आफ्नै निवासमा सुतेकै अवस्थामा मृत भेटिएका छन ।
उनी कोठामा भित्रबाट चुकुल लगाएको अवस्थामा शनिबार दिउँसो मृत भेटिएको महानगरीय प्रहरी वृत्त कमल पोखरीले जानकारी दिएको छ।
क्षेत्रीको शव हाल पोस्टमार्टमका लागि त्रिवि शिक्षण अस्पताल महाराजगन्जमा पठाएको प्रहरीले जनाएको छ । मृत्युको कारण खुली नसकेको प्रहरीको भनाइ छ।
लामो समय पर्दाबाहिर रहेका ५८ वर्षीय क्षेत्री पछिल्लो पटक सुपरहिट फिल्म ‘छ माया छपक्कै’ मा देखिएका थिए । कलाकार क्षेत्रीले सयभन्दा नेपाली चलचित्रमा अभिनय गरेका छन् । उनी चलचित्रमा खलनायक र चरित्र अभिनेताको रुपमा अभिनय गर्दथे ।
‘जीवनदान’, ‘सिमाना’, ‘सेतो सूर्य’, ‘राज्जा रानी’, ‘मसान’, ‘झोला’ लगायतका सयौं फिल्ममा कलाकार क्षेत्रीले अभियन गरेका छन् ।