‘न्यायाधीश मिलाउँछु’ भनेर ४२ लाख रुपैयाँ घूस लिएको आरोपमा अधिवक्ता पक्राउ
प्रकाशित मिति : माघ २४, २०७६ शुक्रबार
जिल्ला अदालतमा विचाराधीन मुद्दा मिलाएर जिताइदिन्छु भन्दै ४२ लाख रुपैयाँ घुस लिएको आरोपमा माइतीघरस्थित जन न्यायिक कानुनी सेवामा कार्यरत अधिवक्ता टंकबहादुर राना मगर पक्राउ परेका छन् ।
महानगरीय अपराध महाशाखाबाट खटिएको टोलीले अधिवक्ता मगरलाई पक्राउ गरेको हो ।
‘जन न्यायिक कानूनी सेवा’ नामक ल फर्म सञ्चालन गर्ने कानुन व्यवसायी टंकबहादुरलाई बबरमहलबाट पक्राउ गरिएको हो ।
नख्खु कारागारमा रहेका रमेश दाहाललाई भनसुनमा छुटाइदिन्छु भनेर पीडित परिवारसँग ४२ लाख रुपैयाँ घुस लिएको आरोपमा उनी पक्राउ परेका हुन् । दाहाल राजस्व चुहावटको आरोपमा २७ मंसिर २०७५ मा पक्राउ परेका थिए ।
अदालतले मागेको दुई करोड ५५ लाख रुपैयाँ धरौटी बुझाउन नसकेपछि उनी अहिले नख्खु कारागारमा थुनामा छन् ।
न्यायाधीश मिलाउन भन्दै टंकबहादुरले २४ साउनमा घूस लिएको तर रमेशलाई थुनामुक्त गराउन नसकेको अभियोग छ ।
त्यसपछि रमेशको परिवारले रकम फिर्ता मागेको र रकम फिर्ता नदिएपछि प्रहरीमा उजूरी दिएको रमेशको परिवारको दावी छ ।
