बाढीले बगाउँदा दुई मजदुर बेपत्ता
प्रकाशित मिति : जेष्ठ १९, २०७७ सोमबार
बाढीले बगाउँदा खोला छेउमा पाल टाँगेर बसेका दुई मजदुर बेपत्ता भएका छन् । कैलालीको चुरे गाउँपालिका–१ को पातले खोलामा गएराति अविरल वर्षासँगै आएको बाढीमा सहजपुर–बोगटान सडकखण्डमा मजदुरी गर्दै आएका दुई मजदुर बगेर बेपत्ता भएको प्रहरीले जनाएको छ ।
बेपत्ता हुनेमा कञ्चनपुरको कृष्णपुर नगरपालिका–४ गुलरियाका अन्दाजी ४५ वर्षीय कमल थापा र सोही ठाउँका अन्दाजी २४ वर्षीय गोपाल विक रहेको जिल्ला प्रहरी कार्यालय कैलालीका प्रवक्ता प्रहरी नायव उपरीक्षक दक्षकुमार बस्नेतले जानकारी दिए ।
बेपत्ताहरुको खोजी कार्य भइरहेको जनाइएको छ ।