कोरोना भाइरसपछि चीनको अर्थतन्त्रमा ३.२ प्रतिशतले वृद्धि
प्रकाशित मिति : श्रावण १, २०७७ बिहीबार
![](https://i0.wp.com/www.khasokhas.com/wp-content/uploads/2019/04/china_CR4b2sDMcy.png?fit=840%2C700&ssl=1)
चीनको अर्थतन्त्रमा वर्षको दोस्रो त्रैमासिकमा ३.२ प्रतिशतले वृद्धि भएको छ ।
कोरोना भाइरसका कारण गरिएको लकडानले गर्दा विश्वको दोस्रो ठूलो अर्थतन्त्र भएको चीनको आर्थिक वृद्धि सन् २०२० को पहिलो त्रैमासिकमा ६.८ प्रतिशतले घटेको थियो । तर, बुधबार सार्वजनिक गरिएका तथ्यांकअनुसार चीनको कुल गार्हस्थ उत्पादन (जीडीपी) अप्रिलदेखि जुनसम्म बढेको देखिएको छ ।
चीनले लकडाउन खुकुलो गरेसँगै अर्थतन्त्र उकास्न जोड दिएपछि विश्वले नै चीनको आर्थिक वृद्धिको अवस्थालाई नियालिरहेका थिए । यो अंक विज्ञहरूले अनुमान गरेभन्दा बढी भएको र यसले अर्थतन्त्र एकाएक उकालो लाग्ने अनुमान गरिएको छ ।
बीबीसीका अनुसार चीन प्राविधिक रूपमा आर्थिक मन्दीबाट जोगिएको छ । बीबीसी न्यूज सिंगारका मारिको ओईले गरेको विश्लेषण अनुसार चीनले अनपेक्षित रूपमा लकडाउनपछि अर्थतन्त्रमा सुधार गरेको हो ।
जर्मनको एक बैंकको एक अध्ययनमा चीनको अर्थतन्त्रको भी सेप रिकभरी (V आकारको पुनरुत्थान) लगभग पूरा भएको उल्लेख गरिएको छ । गत मेमा कोरोना भाइरस महामारीका कारण चीनले सन् २०२० को लागि आर्थिक वृद्धिको लक्ष्य नराख्ने बताएको थियो ।
सन् १९९० यता चीनले वार्षिक वृद्धिको लक्ष्य नराखेको यो पहिलोपटक भएको बताइएको छ ।–बीबीसी