एकैपटक दुईवटा ‘टेलिभिजन शो’का साथ आउँदै कलाकार दिक्पाल
प्रकाशित मिति : कार्तिक ४, २०७७ मंगलबार
मोडलिङ क्षेत्रमा अन्तर्राष्ट्रिय उपाधीहरु जितेका र एकसयभन्दा धेरै म्युजिक भिडियोमा अभिनय गरिसकेका कलाकार दिक्पाल कार्की अब एकैपटक दुईवटा टेलिभिजन शोका साथ आउने भएका छन् । उनी टिभी टुडे एचडीमा ‘स्टायल इन सिटी’ र ‘कफी गफ’ कार्यक्रमका साथ आउन लागेका हुन् ।
‘स्टायल इन सिटी’ मोडलिङ र फेशनमा आधारित कार्यक्रम हुने र ‘कफी गफ’ हरेक दिन बेलुका ५ बजेदेखि ६ बजेसम्म प्रशारण हुने मनोरञ्जनात्मक कार्यक्रम रहेको दिक्पालले जानकारी दिए । कोरोना महामारीमा समेत म्युजिक भिडियो र कार्यक्रमहरुमा व्यस्त मोडल दिक्पाल कार्कीले टेलिभिजन शोमार्फत पनि दर्शकहरुको माया पाउने अपेक्षा गरेका छन् ।
दिक्पाल कोरोना महामारीको बेलामा समेत अत्यन्तै व्यस्त रहेका कलाकार हुन् । यो अवधिमा समेत एकदर्जन म्युजिक भिडियोहरु गरिसकेका छन् ।
सन् २००९ देखि मोडलिङ क्षेत्रमा लागेका दिक्पालले २०१८ मा म्यानमारमा सम्पन्न प्रतियोगितामा मिस्टर मोडल अफ द वल्र्डको उपाधी जितेका थिए ।
त्यसको साथै दिक्पालले अरु तीनवटा टाइटल पनि जितेका थिए । मिस्टर किंग अफ क्याटवाक, मिस्टर मोडल चान लोन बेष्ट हेयर र मिस्टर मोडल बेष्ट इन फर्मल वेयरको टाइटल पनि उनले नै हातपारेका थिए ।
यसैगरी कार्कीले विभिन्न अन्तर्रा्ष्ट्रिय ब्राण्डहरुमा समेत मोडलिङ गरिसकेका छन् । उनले मिस्टर ग्राण्ड इन्टरनेशनल २०१७ मा सोसल मिडिया स्टार र पब्लिक च्वाइस अवार्ड जितेका थिए ।
एकसय भन्दा धेरै म्युजिक भिडियो र दुईवटा चलचित्रमा समेत अभिनय गरेका दिक्पाल मोडलिङको क्षेत्रबाट देशलाई अन्तराष्ट्रिय उपाधि जिताउनेमध्येका एक नेपाली हुन् ।