२४ महिनाभित्र भिसा सकिएकाले विना अन्तरवार्ता मार्च ३१ सम्म भिसा नविकरण गर्न पाउने
प्रकाशित मिति : पुस १५, २०७७ बुधबार
अन्तिमपटक अपडेट: मार्च ७, २०२१
अमेरिकी दूतावास काठमाडौंले नियमित भिसा सेवा सुचारु नगरेकाले नयाँ भिजिटर भिसा बीवान /बी टु जारी गरेको छैन । तर पहिले नै भिसा लिएकाहरुको विना अन्तरवार्ता नविकरण भने गरिरहेको छ ।
अहिलेका लागि २४ महिनाभित्र भिसा सकिएकाले विना अन्तरवार्ता भिसा नविकरण गर्न पाउने म्याद मार्च ३१, २०२१ सम्म रहेको छ । मार्च ३१, २०२१ सम्म विगत २४ महिनामा भिसा सकिएकाहरुले अमेरिकी दूतावास वा कन्सुलेटमा विना अन्तरवार्ता भिसा नविकरण गर्न सक्छन् ।
यसअगाडि डिसेम्बर ३१ सम्मका लागि यो सुविधा प्रदान गरिएकोमा यो अवधि मार्च अन्तिमसम्म अस्थायी रुपमा थप गरिएको थियो । दूतावास वा कन्सुलेटले निश्चित प्रकारका गैरआप्रवासी भिसाहरु अवधि सकिएको २४ महिनाभित्र विना अन्तरवार्ता नविकरण गर्न सक्नेछन् । कोरोनाको महामारीका कारण यो सुविधा प्रदान गरिएको हो ।
विगतमा भिसा अवधि सकिएको १२ महिनाभित्रमात्र गैरआप्रवासी भिसाका आवेदकहरुले विना अन्तरवार्ता सोही श्रेणीका नयाँ भिसा प्राप्त गर्नसक्ने प्रावधान रहेको थियो । पुरानै श्रेणीको नयाँ अमेरिकी गैरआप्रवासी भिसा लिंदा कैयन आवेदनहरुले भिसा सकिएको दुईबर्षभित्र अमेरिकी दूतावास वा कन्सुलेटमा अन्तरवार्ता नदिइकनै नयाँ भिसा पाउन सक्नेछन् ।
उदाहरणका लागि विगतमा भिजिटर भिसा लिएको व्यक्तिले पुन: भिजिटर भिसा लिनुपरेमा भिसा सकिएको २४ महिनासम्म पनि विना अन्तरवार्ता नयाँ भिसा प्राप्त गर्नसक्नेछन् । अर्थात् विना अन्तरवार्ता नै भिसा नविकरण गर्न सक्नेछन् ।
भिजिटर लगायतका गैरआप्रवासी भिसाका सन्दर्भमामात्र यो नियम लागु हुने जनाइएको छ । भिसा अन्तरवार्ता दिनुपर्ने वा नपर्ने कुराको निर्धारण सम्बन्धित दूतावास वा कन्सुलेटले गर्नेछन् ।
थप जानकारीका लागि गैरआप्रवासी भिसा आवेदकहरुलाई आफ्नो नजिकको अमेरिकी दूतावास वा कन्सुलेटको वेवसाइटमा जान सुझाव दिइएको छ ।
मापदण्डहरु
अमेरिकाको भिजिटर भिसा समाप्त भएको २ बर्ष पूरा भएको छैन वा भिसा सकिन लागेको छ भने तपाईले त्यो भिसा दूतावासमा विना अन्तरवार्ता नै रिन्यु गर्न सक्नुहुनेछ । तर त्यसका लागि तपाईले मापदण्डहरु पूरा गर्नुपर्छ ।
तपाईको भिजिटर भिसा (बी) भिसा रिन्यु गर्नका लागि तपाईले सन् २००८ को जनवरी १ वा त्यसपछि पूरानो भिसाका लागि अन्तरवार्ता दिएको हुनुपर्छ । तपाईको पहिलेको भिसा मल्टिपल इन्ट्री सहितको हुनुपर्छ ।
पहिले जारी भएको भिसा पूरा अवधि अर्थात ५ बर्षका लागि नै जारी भएको हुनुपर्छ । भिजिटर भिसाका लागि हालेको आवेदन अस्वीकृत भएको हुनुहुँदैन भने पूरानो भिसा हराएको, चोरी भएको वा खारेज गरिएको हुनुहुँदैन ।
त्यस्तै जन्ममिति, नाम, राष्ट्रियता जन्मस्थान लगायतका विवरणहरु परिवर्तन भएको हुनुहुँदैन । अमेरिका भ्रमणका क्रममा अमेरिकी कानुनको पालना गरेको हुनुपर्छ भने भिसा सकिएको २ बर्ष नाघेको हुनुहुँदैन ।
यदि यी मापदण्डहरु पूरा भएको खण्डमा तपाईले विना अन्तरवार्ता नै भिसा नविकरण गराउन सक्नुहुनेछ । त्यसका लागि तपाईले डीएस १६० नामको फर्म भने भर्नुपर्छ ।
त्यसपछि भिसा शुल्क तिरेर तपाईले अप्वाइन्टमेन्ट लिने पेजबाट आवश्यक कागजातको सुची सहितको पत्र प्राप्त गर्नुहुनेछ । त्यो पत्रको दुईकपी प्रिन्ट गरेर तपाईले एककपी पत्र, तपाईको पासपोर्ट, डीएस १६० कन्फर्मेशन पेज, विगतको भिसा, एक तस्विर, सर्पोर्टिंग कागजात दूतावाससमक्ष बुझाउनुपर्छ ।
त्यसपछि तपाईले केहीदिनमा नविकरण गरिएको भिसा पाउनसक्नुहुनेछ ।