आज अमेरिकामा आउने शरणार्थीको कोटा संख्या बढाउने घोषणा गर्दै बाइडेन प्रशासन
प्रकाशित मिति : माघ २२, २०७७ बिहीबार
बाइडेन प्रशासनले आज अमेरिकामा आउने शरणार्थीको संख्या बढाउने घोषणा गर्ने अपेक्षा गरिएको छ । यस्तो घोषणाले बार्षिक अमेरिका आउन पाउने शरणार्थीहरुको कोटा संख्या बृद्धि गर्नेछ ।
डोनाल्ड ट्रम्पले शरणार्थीहरुको बार्षिक कोटा घटाउँदै लगेकोमा जो बाइडेनले चुनावी अभियानताका नै यो संख्या उल्लेख्य बृद्धि गर्ने प्रतिबद्धता जनाउँदै आएका थिए । आज अमेरिकी विदेश मन्त्रालयको भ्रमण र कर्मचारीहरुसँग भेटघाटका क्रममा बाइडेनले यस्तो घोषणा गर्ने जनाइएको छ । बाइडेनले दिउसो साढे १ बजे अमेरिकी विदेशमन्त्रालयमा भेटघाटको कार्यक्रम तय भएको छ ।
राष्ट्रपति बाइडेन र उपराष्ट्रपति कमला ह्यारिसले दिउसो २ बजे विदेशमन्त्रीलाई भेट्नेछन् भने २ बजेर ४५ मिनेट जाँदा बाइडेनले सम्बोधन गर्ने कार्यक्रम रहेको छ । जसमा उपराष्ट्रपति कमला ह्यारिस पनि उपस्थीत हुनेछिन् । ३ बजेर २० मिनेट जाँदा बाइडेन त्यहाँबाट ह्वाइटहाउसतिर प्रस्थान गर्ने खसोखासलाई प्राप्त तालिकामा उल्लेख छ ।
दिउसोको सम्बोधनका क्रममा बाइडेनले शरणार्थीको संख्याबृद्धिबारे घोषणा गर्ने अपेक्षा गरिएपनि कति संख्यामा बृद्धि गर्ने भन्नेबारे केही खुलाइएको छैन । ट्रम्पले चालु आर्थिक बर्षका लागि शरणार्थीको संख्या कोटा घटाएर १५ हजारमा झारेका छन्, जुन सन् १९८० यताकै सबैभन्दा कम हो । बाइडेनले शरणार्थीको बार्षिक कोटासंख्या बढाउँदै लगेर बार्षिक १ लाख २५ हजारसम्म बनाउने प्रतिबद्धता जनाएका थिए ।
तर यो योजना कार्यान्वयनका लागि अक्टोबरसम्म अर्थात् चालु आर्थिक बर्ष समाप्त हुँदासम्म भने प्रतिक्षा गर्नुपर्नेछ । नेपालबाट अमेरिका आउने भुटानी शरणार्थीको संख्या यस्तै कोटामा आधारित थियो । तर यो कोटामा अमेरिकाभित्रै आएर एसाइलम दावी गर्नेहरुको संख्या भने पर्दैन ।