सरकार र विप्लव नेकपाबीच सहमतिपत्रमा हस्ताक्षर
प्रकाशित मिति : फाल्गुन २१, २०७७ शुक्रबार
सरकार र विप्लव नेतृत्वको नेपाल कम्युनिष्ट पार्टी (नेकपा) बीच सहमतिपत्रमा हस्ताक्षर भएको छ। काठमाडौंको राष्ट्रिय सभागृहमा शुक्रबार आयोजित कार्यक्रममा सरकारका तर्फबाट गृहमन्त्री रामबहादुर थापा र नेकपाका तर्फबाट प्रवक्ता खड्गबहादुर विश्वकर्मा ‘प्रकाण्ड’ ले हस्ताक्षर गरेका हुन्।
सरकारी वार्ता टोली र विप्लव नेकपाको वार्ता टोलीबीच बिहीबार ३ बुँदे सहमति भएको थियो।
वार्ता टोलीका सदस्य डा. राजन भट्टराईले विप्लव नेकपासँग एक वर्षदेखि विभिन्न माध्यमबाट प्रत्यक्ष, अप्रत्यक्ष छलफल र संवाद अघि बढेको उल्लेख गर्दै सरकारका तर्फबाट प्रधानमन्त्री आफैंले र विप्लव नेकपाका तर्फबाट चन्दले संवादको नेतृत्व गरिरहेको बताए।
उनले पछिल्लोपटक मंसिरयता प्रयासलाई अगाडि बढाएको र तीन बुँदे सहमति भएको पनि भट्टराईले बताए।
यी हुन् सहमतिका बुँदाहरु
१. दुवै पक्ष नेपाल सरकार नेपाल कम्युनिस्ट पार्टी देशको राजनीतिक समस्याहरु वार्ता र सम्वादबाट समाधान गर्न सहमत भएका छौं।
२. नेपाल कम्युनिस्ट पार्टी आफ्ना सबै राजनीतिक क्रियाकलाप शान्तिपूर्ण रुपमा गर्न सहमत भएको छ।
३. नेपाल सरकार नेपाल कम्युनिस्ट पार्टीमाथि लगाएको प्रतिबन्ध हटाउन, कारागारमा रहेका पार्टीका नेता र कार्यकर्ता रिहाई गर्न र सम्पूर्ण मुद्दाहरु खारेज गर्न सहमत भएको छ।
