दुर्गाप्रसाद तिम्सिनाले लिए नागरिकता
प्रकाशित मिति : चैत्र १२, २०७७ बिहीबार
विनासुनुवाइ ४० वर्ष भारतीय जेलमा बिताएर स्वदेश फर्किएका इलामका दुर्गाप्रसाद तिम्सिनाले नागरिकता लिएका छन्। भतिजा गोपाल तिम्सिनाले सनाखत गरेपछि उनलाई जिल्ला प्रशासन कार्यालय इलामले बिहीबार नागरिकता दिएको हो।
उनको जन्मस्थानमा एकतप्पा गाविस र हालको ठेगानामा माइ नगरपालिका १० लुम्बाक राखिएको छ। जन्ममिति भने २०१७ साउन २० गते उल्लेख छ। नागरिकतामा प्रशासकीय अधिकृत देवीचरण फुयाँलले हस्ताक्षर गरेका छन्। उनको नागरिकता बनाउन बुधबार वडा कार्यालयले सिफारिस गरिदिएको थियो।
स्वदेश फर्कँदा मानसिक रुपमा कमजोर देखिएका दुर्गाप्रसाद बिस्तारै परिवारसँग घुलमिल हुन थालेका छन्। उनको उपचार भने प्रदेश १ सरकारले गरिदिने घोषणा गरिसकेको छ।
अदालतको आदेशपछि गत शनिबार दुर्गाप्रसाद कोलकातास्थित दमदम जेलबाट छुटेका थिए। तिम्सिना दार्जिलिङ आन्दोलनका क्रममा एक महिलाको ज्यान मारेको मुद्दामा पक्राउ परेका थिए। उनलाई दार्जिलिङबाट पक्राउ गरि विभिन्न कारागार हुँदै कोलकाता पुर्याइएको थियो। उनले आफू निर्दोष भएको बताएका छन्। लामो अवधि जेलमा शारीरिक र मानसिक यातनाका कारण उनको स्वास्थ्य अवस्था नाजुक छ।