बालरोग विशेषज्ञहरुको आग्रह : बालबालिकालाई विद्यालय नपठाऊँ
प्रकाशित मिति : बैशाख ५, २०७८ आईतबार
बालरोग विशेषज्ञहरुको संस्था नेपाल पेडियाट्रिक सोसाईटीले कोरोना संक्रमणको जोखिममा बालबालिकाहरु रहेको भन्दै उनीहरुलाई विद्यालय नपठाउन अभिभावकहरुलाई अपिल गरेको छ।
सोसाइटीले आइतबार विज्ञप्ति जारी गर्दै स्वास्थ्य मापदण्ड पूरा हुने अवस्था भएमात्र बालबालिकालाई विद्यालय वा कलेज पठाउन आग्रह गरेको हो।
पहिलो लहरको कोरोना संक्रमणको तुलनामा यो कोभिड–१९ कम उमेरका व्यक्तिहरुमा संक्रमण भइरहेको छ। संक्रमण पुष्टि भएकामध्ये १० प्रतिशत संक्रमितहरु बालबालिका नै रहेका छन्।
विज्ञप्तिमा भनिएको छ, ‘हाल नेपालमा युके भेरियन्ट, डबल म्युटेन्ट भेरियन्टहरु भेटिएका छन्। यी भेरियन्टहरु पहिलाका स्वरुपहरुको भन्दा छिटो फैलिनुका साथै बालबालिका, युवाहरु बढी संक्रमित भएको पाइएको छ। ठूला व्यक्तिहरुको तुलनामा बालबालिकाहरुको परीक्षण कम भएको पाइएको छ। बालबालिकाहरु बिरामी हुँदा, विदेश जानुपरे, परिवारका सदस्यहरुमा संक्रमण देखिए मात्र परीक्षण भएको देखिन्छ। त्यसैले बढी सतर्क हुनुपर्दछ।’
कतिपय बालबालिकामा लक्षण नदेखिए पनि उनीहरुले अन्य व्यक्तिहरुमा सार्नसक्ने सम्भावना रहेको विज्ञप्तिमा उल्लेख छ।
रोग लागेको ४ देखि ६ हप्तापछि मल्टि सिस्टम इन्फ्लामेटोरी सिन्ड्रोम (एमआईएससी) भई बालबालिकाहरु सिकिस्त अवस्थामा पुग्ने बताइएको छ।
यो रोग लागे बच्चाहरुलाई गम्भीर विरामी बनाउँदछ, आईसीयुको आवश्यकता पर्छ भने उपचार पनि निकै महंगो रहेको छ।
एमआईएससीका लक्षणहरुमा ज्वरो, कडा झाडापखाला, बढी पेट दुख्ने, श्वास फेर्न गार्हो हुने, मुटुमा समस्या हुने आदि हुन्।
