एमाले विवाद सहमतिनजिक, कार्यदलको बैठक शनिबार पनि
प्रकाशित मिति : असार २५, २०७८ शुक्रबार
नेकपा एमालेको विवाद समाधान गर्ने विषयमा नेताहरु सहमतिनजिक पुगेका छन्। शुक्रबार करिब आठ घण्टासम्म लगातार बसेको कार्यदलकाे बैठकमा केही विषयलाई छाडेर लगभग सहमतिनजिक पुगेको नेताहरुले जनाएका हुन्।
बैठकपछि कार्यदल सदस्य गाेकर्ण विष्टले भने, ‘धेरै विषयमा सहमतिनजिक पुगेका छौं, एकाध विषय टुंगिन बाँकी छन्, तिनलाई शनिबार बसेर टुंग्याउनेछौं।’
उनले विवादका करिब आधा दर्जन विषयमा लगभग सहमतिमा पुगेको दाबी पनि गरे।
यस्तै, कार्यदलका सदस्य एवं एमाले प्रवक्ता प्रदीप ज्ञवालीले पनि पार्टीको एकतालाई सुदृढ गर्नेसम्बन्धमा सहमतिमा पुगेको प्रतिक्रिया दिए। ‘सहमतिको दस्तावेजलाई अन्तिम रुप दिन, त्यसका केही थोरै भाषिक परिमार्जनलगायतका केही विषयमा शनिबार पुनः बस्नुपर्ने भएकाले आज बैठक स्थगन गरेका छौं,’ उनले भने।