कोरोना संक्रमण एक महिनायताकै उच्च, ३१०८ संक्रमित थपिए, २५ को मृत्यु
प्रकाशित मिति : श्रावण ५, २०७८ मंगलबार
नेपालमा कोरोना संक्रमणदर पुनः बढ्न थालेको छ। स्वास्थ्य तथा जनसंख्या मन्त्रालयका अनुसार २४ घण्टामा नेपालमा थप ३ हजार १ सय ८ जनामा संक्रमण पुष्टि भएको छ। यो एक महिनायताकै उच्च संख्या हो।
१३ हजार १३५ नमुना परीक्षण गरिएकोमा उक्त संख्यामा संक्रमण पुष्टि भएको हो।
मंगलबार कोरोना संक्रमणबाट २५ जनाको मृत्यु भएको छ। योसँगै नेपालमा कोरोनाबाट मृत्यु हुनेको संख्या ९ हजार ६०७ पुगेको छ।
मन्त्रालयको तथ्यांक अनुसार मंगलबार १ हजार ५९५ जना संक्रमणमुक्त भएका छन्। हालसम्म कुल संक्रमितमध्ये ६ लाख ३४ हजार ९२७ निको भएका छन्।
मंगलबारसम्म देशभर सक्रिय संक्रमितको संख्या २६ हजार ४१९ रहेको छ। देशभर ३२६ जना क्वारेन्टाइनमा रहेको मन्त्रालयले जनाएको छ।