काठमाडौंमा आष्ट्राजेनेकाको दोस्रो डोज वितरण गरिदै, कहाँ कहाँ उपलब्ध छ ?
प्रकाशित मिति : कार्तिक १०, २०७८ बुधबार
काठमाडौंका ८ वटा स्थानीय तहमा कोभिड–१९ विरुद्धको आष्ट्राजेनेका खोपको दोस्रो डोज लगाउन सुरु गरिएको छ । काठमाडौंमा कार्थिक ९ गतेदेखि दोश्रो डोज लगाउन सुरु गरिएकोमा तीनदिनसम्म अर्थात् कार्तिक ११ सम्म लगाइनेछ ।
जिल्ला स्वास्थ्य कार्यालय काठमाडौंले जारी गरेको सुचना अनुशार काठमाडौंका ८ वटा स्थानीय तहमा १८ वर्षमाथि उमेर समूहका पहिलो डोज एस्ट्राजेनेका खोप पाएकालाई दोस्रो डोज लगाइदैछ । उक्त सूचना अनुसार काठमाडौं महानगरपालिका, कीर्तिपुर नगरपालिका, चन्द्रागिरि नगरपालिका, नागार्जुन नगरपालिका, कागेश्वरी मनोहरा नगरपालिका, तारकेश्वर नगरपालिका, टोखा नगरपालिका र गोकर्णेश्वर नगरपालिकामा आष्ट्राजेनेकाको दोस्रो डोज लगाइने छ ।
काठमाडौं महानगरपालिकाको हकमा आज कात्तिक १० गतेदेखि सबै वडामा खोप केन्द्र सञ्चालन गरिएको छ भने आवश्यकताको आधारमा खोप लगाउने अवधि पनि थप गर्न सकिने जनाइएको छ । खोप लगाउन आउने व्यक्तिले पहिलो डोज खोप लगाएको खोप कार्ड र विद्युतीय दर्ता गरेको प्रिन्ट वा फोटोसहित आउन पनि स्वास्थ्य कार्यालयले अनुरोध गरेको छ । स्वास्थ्य कार्यालय काठमाडौंले १८ वर्षमाथिका समूहलाई एस्ट्राजेनेकाको पहिलो डोज लगाएको थियो ।
काठमाडौं महानगरपालिकाको हकमा पाँच वटा अस्पतालबाट पनि एस्ट्राजेनेकाको दोस्रो डोज वितरण भइरहेको छ । महाराजगञ्जस्थित नेपाल प्रहरी अस्पताल, छाउनीस्थित वीरेन्द्र सैनिक अस्पताल, रत्नपार्कस्थित वीर अस्पताल, थापाथलीस्थित परोपकार प्रसूति गृह तथा स्त्रीरोग अस्पताल र बानेश्वस्थित निजामती कर्मचारी अस्पतालबाट खोप कार्यक्रम सञ्चालन भइरहेको छ ।