नेपालमा ९१ लाखले लगाए कोरोनाबिरुद्धको खोप, अब १८ बर्षमाथिका सबैलाई
प्रकाशित मिति : मंसिर ४, २०७८ शनिबार
अब नेपालमा कोरोनाभाइरस विरुद्धको खोप देशभर १८ वर्ष माथिका सबैलाई दिइने भएको छ । १८ बर्षभन्दा माथिका सबैलाई खोप लगाउन प्रदेशहरूमा खोप पठाउने काम भइरहेको जनाइएको छ । यसअघि सरकारले कोरोनाभाइरस विरुद्धको खोप उमेर र पेसालाई वर्गीकरण गरेर अभियानका रूपमा दिँदै आएको थियो ।
अहिले नेपालमा झण्डै ३६ लाख खोप उपलब्ध रहेको छ । खोप लगाउन बाँकी रहेका १८ वर्षभन्दा कम उमेरका बालबालिका लागि खरिद सम्झौता गरिएको खोप आउन भने अझै बाँकी रहेको छ । उक्त खोप डिसेम्बरभित्र आउने अपेक्षा गरिएको छ ।
खोपको उपलब्धताका आधारमा केही जिल्लाहरूले १८ वर्षभन्दा माथिका सबैलाई खोप दिन सुरु गरे पनि धेरै जसो जिल्लामा १८ वर्ष माथिका सबैले खोप पाउन सकेका छैनन्। खोप सल्लाहकार समितिको बैठकले १८ वर्ष माथिका सबैलाई खोप दिने निर्णय गरेको हो ।
झण्डै एकलाख डोज फाइजर खोप आएकोमा उक्त खोप भने १२ बर्षमाथिका दीर्घरोगी बालबालिकालाई मात्रै दिइएको छ । फाइजर खोप अरू बालबालिकालाई पनि लगाउनका लागि सरकारले खरिद सम्झौता गरिसकेको जनाएको छ। ६० लाखको खरिद सम्झौता भएको र १० वा १५ लाखको दरले भण्डार क्षमता अनुसार आउने जनाइएको छ ।
स्वास्थ्य मन्त्रालयका अनुसार हालसम्म झन्डै ९१ लाखले कम्तीमा एक मात्रा र ७८ लाखभन्दा बढीले दोस्रो मात्रा खोप लगाइसकेका छन्।
खोप नलगाउने धेरै जनसङ्ख्या १८ वर्षभन्दा तलको छ।