धर्मशालाको निरीक्षणपछि मन्त्री आलेले भन्नुभयो,”धर्मशालालाई त ‘सेभेन स्टार’ होटेल बनाएछन्”
प्रकाशित मिति : माघ २, २०७८ आईतबार
![](https://i0.wp.com/www.khasokhas.com/wp-content/uploads/2022/01/Prem-ale-1230-nnnnn-1024x683-1.jpg?fit=1024%2C683&ssl=1)
संस्कृति पर्यटन तथा नागरिक उड्डयनमन्त्री प्रेम आलेले पशुपतिस्थित धर्मशाला अतिक्रमणबारे निरीक्षण गर्नुभएको छ। बतास समूहले होटलका रुपमा सञ्चालन गरिरहेको उक्त धर्मशालाको निरीक्षण गर्दा आफू छक्कै परेको बताउनुभएको छ ।
आइतबार आफ्नो टोलीसहित धर्मशाला निरीक्षणमा पुगेका मन्त्री आलेले भन्नुभयो, ‘धर्मशाला त फाइभ स्टार होइन, सेभेनस्टार होटलकै रुपमा बनाएछन् । छानबिन गरेर दूधको दूध पानीको पानी छुट्याउँछौँ । धर्मशाला बेच्नेलाई कारबाही गरेर छाड्छौँ ।’ उहाँले कसरी टेण्डर गरिएको रहेछ र कहाँसम्मको साँठगाँठ रहेछ भन्नेबारे छानबिन समितिको प्रतिवेदनपछि थाहा हुने बताउनुभयो । प्रतिवेदनको आधारमा आफूले थप कदम चाल्ने मन्त्री आलेको बताउनुभयो ।
पशुपति क्षेत्र विकास कोषका कोषाध्यक्षको संयोजकत्वमा छानबिन समिति बनाइएको छ । प्रतिवेदनपछि थप निर्णय लिइने उहाँले बताउनुभयो ।
पशुपतिनाथको दर्शन गर्न आउने तीर्थयात्रीहरुलाई खान र बस्न सुविधा दिने उद्देश्यले भारत सरकारले धर्मशाला बनाइदिएको थियो । बतास समूहले होटेल आनन्द नाममा उक्त धर्मशालामा व्यवसाय चलाइरहेको छ ।
निरीक्षणपछि मन्त्री आलेले एकै कोठाको एक दिनको भाडा नै खाना–खाजाबाहेक ७ हजारसम्म लिने गरेको बताउनुभयो । ‘सस्तो र सुलभ मूल्यमा भक्तजनले बस्न पाउनुपर्नेमा, यहाँ त सेभेन स्टार होटलजस्तै चलाइएको रहेछ । प्रतिवेदन आएपछि कारबाही अघि बढाउछौँ ।’