बिहारका पूर्व मुख्यमन्त्री लालु यादवलाई ५ वर्षको जेल सजाय, ६० लाखको जरिवाना
प्रकाशित मिति : फाल्गुन ९, २०७८ सोमबार
बिहारका पूर्व मुख्यमन्त्री तथा राष्ट्रिय जनता दलका अध्यक्ष लालुप्रसाद यादवलाई चारा घोटालाको पाँचौं मुद्दामा झारखण्डको विशेष सीबीआई अदालतले सोमबार पाँच वर्षको जेल सजाय सुनाएको छ । अदालतले उनलाई ६० लाख जरिवाना समेत गरेको छ । उनलाई अदालतले १५ फेब्रुअरीमा दोषी ठहर गरेको थियो ।
लालुप्रसाद यादव सोमबार भिडियो कन्फ्रेन्समार्फत अदालतमा उपस्थित भएपनि अदालत परिसरमा ठूलो भीड जम्मा भएको थियो । सुरक्षालाई ध्यानमा राख्दै प्रहरीले थप टोली परिचालन गर्नुपरेको थियो ।
लालुप्रसाद यादवका वकिल प्रभात कुमारले बीबीसी हिन्दीलाई भने, “लालु यादवको उमेर, स्वास्थ्य र उनले पशुपालन घोटालाका अन्य मुद्दामा सजाय भोगेको अवधिलाई हेरेर अदालतले उनलाई न्यूनतम सजायको माग गरेको थियो।” लालु यादवका वकिलले सजायविरुद्ध उच्च अदालतमा अपिल गर्ने बताएका छन् ।
लालुप्रसाद यादवका छोरा तथा आरजेडी नेता तेजस्वी यादवले भने, “यो अन्तिम निर्णय होइन। यो निर्णयलाई उच्च अदालतमा चुनौती दिइनेछ। मलाई तल्लो अदालतको फैसला उच्च अदालतमा परिवर्तन हुनेमा पूर्ण विश्वास छ।” “यो निर्णय लालुजीको पक्षमा आउनेछ।”
Fifth fodder scam case | CBI court in Ranchi sentences RJD leader Lalu Prasad Yadav to 5 years' imprisonment and imposes Rs 60 Lakh fine on him. pic.twitter.com/413701Rt5W
— ANI (@ANI) February 21, 2022
अदालतले मंगलबार (१५ फेब्रुअरी) मात्रै जगदीश शर्मासहित ३८ दोषीलाई सजाय सुनाएको थियो । उनलाई तीन वर्षको जेल सजाय सुनाइएको थियो । उनलाई तत्काल जमानत दिइयो। लालु यादवले २०१७ मा चारा र पशुपालन घोटालाको अन्य मुद्दामा दोषी ठहर भएदेखि कूल ८ महिना जेल र ३१ महिना अस्पतालमा बिताएका छन्। उनले राँचीको होटवारस्थित बिरसा मुण्डा जेलमा आठ महिना बिताए।
यसअघि फेब्रुअरी १५ मा दोषी ठहर भएपछि लालु यादवलाई राँचीको बिरसा मुण्डा केन्द्रीय जेल पठाइएको थियो र त्यहाँबाट उनलाई रिम्स अस्पतालमा ल्याइएको थियो। चिकित्सकको टोलीले उनको स्वास्थ्यको निगरानी गर्न उनलाई यहाँको पेइङ वार्डमा भर्ना गरिएको हो । लालु यादवका वकिलहरूले उनको स्वास्थ्य खराब भएको भन्दै सीबीआई अदालतमा निवेदन दिएका थिए, जसलाई अदालतले स्वीकार गरेको थियो ।
