श्रीलङ्काको केन्द्रीय बैंकका प्रमुखले दिएको चेतावनीले बढ्यो चिन्ता
प्रकाशित मिति : बैशाख २८, २०७९ बुधबार
श्रीलङ्काको केन्द्रीय बैंकका प्रमुखले मे ११ मा राजनीतिक स्थायित्व तुरुन्तै पुनस्र्थापित गरिएन र संकटग्रस्त श्रीलङ्कालाई चलायमान गराउनका लागि नयाँ सरकार नियुक्त गरिएन भने अर्थतन्त्र ‘पूर्ण रूपमा ध्वस्त’ हुने चेतावनी दिएका छन् । अङ्ग्रेजी पत्रिका द हिन्दूले यो समाचारलाई प्रमुख स्थान दिएको छ ।
कोलम्बोमा सञ्चारमाध्यमसँग कुरा गर्दै श्रीलङ्काको केन्द्रीय बैंकका प्रमुख नन्दलाल वीरासिङ्घेले भने, ‘यदि आगामी दुई दिनमा सरकार गठन भएन भने अर्थतन्त्र पूर्ण रूपमा ध्वस्त हुनेछ र यसलाई कसैले बचाउन सक्नेछैन ।’ नन्दलाल वीरासिङ्घे एक महिनाअघि मात्रै केन्द्रीय बैंकको प्रमुख बनेका थिए ।
वीरासिङ्घेको भनाइले श्रीलङ्काको अर्थतन्त्रको दयनीय अवस्था देखाउँछ । विगत दुई वर्षदेखि ऋण तिर्न नसक्दा डलरको सञ्चिति घटेपछि अहिले मुलुकको अर्थतन्त्र धरासायी भएको छ । यो साता देशमा हिंसात्मक झडप पनि भयो । पूर्वप्रधानमन्त्री महिन्दा राजापाक्षेका समर्थकहरूले शान्तिपूर्ण प्रदर्शन गरिरहेका मानिसहरूमाथि आक्रमण गरेपछि यी झडप सुरु भएको हो ।
यससँगै महिन्दा राजापाक्षेले पनि प्रधानमन्त्री पदबाट राजीनामा दिएपछि संविधानअनुसार अब मन्त्रिपरिषद् पनि विघटन भएको छ । अब राष्ट्रपति गोटाबाया राजापाक्षे मात्रै उनको पदमा रहन्छन् र उनको नेतृत्वमा कुनै पनि विपक्षी दल बिना शर्त काम गर्न तयार छैनन् ।
दलहरू, नागरिक समाज र विद्यार्थी संगठनहरूले राष्ट्रपति गोटाबाया राजापाक्षेको राजीनामा र कार्यवाहक राष्ट्रपतिको खारेजलगायतका केही प्रस्ताव राखेका छन् ।
एकातिर नेतृत्व अन्योलमा फसेको बेला अर्कातिर खाद्यान्न, इन्धन र खाना पकाउने ग्यासको अभावमा पिडित नागरिकहरु पिरोलिरहेका छन् । राजापक्षे समर्थक भीडको आक्रमण र आक्रोशित नागरिकको जवाफी हमलाले हिंसामा वृद्धि हुने आशंका बढाएको छ ।
हिंसात्मक झडपमा कम्तीमा आठ जनाको मृत्यु भएको छ भने २०० भन्दा बढी घाइते भएका छन् । देशभरि व्यापक जवाफी हमला अन्तर्गत अराजक तत्वले सरकारी सदस्यसँग सम्बन्धित करिब सयभन्दा बढी भवनमा आगलागी गरेका छन् र दर्जन बढी यातायातका साधनमाथि पनि आगजनी गरेका छन् ।
यसैबीच, महिन्दा राजापाक्षेलाई उनको आधिकारिक निवास टेम्पल ट्रीजबाट सुरक्षित रूपमा बाहिर निकालेर पूर्वी बन्दरगाह सहर त्रिन्कोमाली लगिएको छ । रक्षा मन्त्रालयका सचिव कमल गुणरत्नेले सो जानकारी दिए । उनले महिन्दा राजापाक्षेलाई मे १० मा त्यहाँ लगिएको र सुरक्षाका कारण केही दिन त्यहाँ बस्ने बताए ।-एजेन्सी
