चीनका ३९ लडाकु विमान र १३ वटा युद्धपोत ताइवानको क्षेत्रमा पुगे
प्रकाशित मिति : श्रावण २४, २०७९ मंगलबार
अमेरिकी प्रतिनिधि सभाका सभामुख न्यान्सी पेलोसीको गत हप्ता ताइवान भ्रमणको प्रतिक्रियास्वरूप चीनले ठूलो मात्रामा सैन्य अभ्यास जारी राखेको छ ।
चीनको यो सैन्य अभ्यास ताइवान वरपर जारी छ। ताइवानका विदेशमन्त्रीले चीनको यो सैन्य अभ्यास आक्रमणको तयारी भएको बताएका छन् । चीनले पहिले नै भनेको थियो, यदि आवश्यक भएमा उसले ताइवानमाथि बल प्रयोग गर्न सक्छ।
मंगलबार सञ्चारमाध्यमसँग कुरा गर्दै ताइवानका विदेशमन्त्री जोसेफ वुले चीनले ताइवान स्ट्रेटको यथास्थिति परिवर्तन गर्ने प्रयास गरिरहेको बताए। उनले भने, ‘चीनको सैन्य गतिविधि हेर्दा आक्रमण गर्न सक्ने चिन्ता बढाएको छ।’
जोसेफ वुले भने, ‘ताइवान स्ट्रेटमा मध्य रेखाको सन्दर्भमा दशकौंदेखि यथास्थिति रहेको छ। मध्य रेखा चीन र ताइवान बीच यथास्थितिको प्रतीक भएको छ। तर पछिल्ला केही दिनमा चिनियाँ सैन्य अभ्यासका कारण यसलाई क्षति पुगेको छ । यसले ताइवानको क्षेत्रीय शा
बुधवार र आइतबारको बीचमा, चीनले मध्य रेखा पार गरी १२० विमान पठाएको छ। ताइवानले पनि जवाफमा विमान र जहाजहरू तैनाथ गरेको छ। ताइवानले चिनियाँ आक्रामकताको निगरानी गर्न यी तैनाथहरू आवश्यक भएको बताएको छ। जोसेफ वुले भने, ‘ताइवान स्ट्रेटको यथास्थितिलाई जोगाउन र कायम राख्न हामीलाई सम्भव भएसम्म विश्वका धेरै देशहरूको समर्थन चाहिन्छ।’
ताइवानको रक्षा मन्त्रालयले सोमबार साँझ ५ बजेतिर ३९ चिनियाँ लडाकु विमान र १३ वटा युद्धपोत ताइवानको जलक्षेत्रमा आइपुगेको जनाएको छ । यसबाहेक सोमबार पिपुल्स लिबरेसन आर्मीका २१ जेट विमान मध्य रेखा पार गरेर ताइवानको जलक्षेत्रमा प्रवेश गरेका थिए ।
