पाकिस्तानमा बस र तेल ट्याङ्कर ठोक्किँदा २० यात्रुको मृत्यु
प्रकाशित मिति : श्रावण ३१, २०७९ मंगलबार
पाकिस्तानको पञ्जाब प्रान्तमा मंगलबार यात्रुवाहक बस र तेल ट्याङ्कर एक आपसमा ठोक्किँदा कम्तीमा २० जनाको मृत्यु भएको छ । प्रदेशमा तीन दिनमा यो दोस्रो ठूलो सडक दुर्घटना हो । यो घटना लाहोरबाट करिब ३५० किलोमिटर टाढा रहेको मुल्तानको ‘मोटरवे’ मा भएको प्रहरीले जनाएको छ । आपतकालीन सेवा ‘रेस्क्यु ११२२’ का प्रवक्ताले भने, ‘लाहोरबाट कराँची जाँदै गरेको बस र तेल ट्याङ्करबीचको ठक्करबाट २० जनाको मृत्यु भएको छ । ठोक्किएपछि बसमा आगलागी हुँदा यात्रुहरु घाइते भएका छन् ।’
आगलागीमा परी जलेका ६ जना यात्रुलाई मुल्तानको निस्तार अस्पतालमा भर्ना गरिएको उनले बताए । उनीहरुको अवस्था गम्भीर रहेको बताइएको छ । ‘दुर्घटनामा ज्यान गुमाएका केहीको शव पूर्ण रुपमा जलेको र उनीहरुको पहिचान खुल्न बाँकी छ । उनीहरुको शव डिएनए परीक्षणका लागि परिवारलाई बुझाइनेछ ।’
दुर्घटनापछि दुवै सवारीसाधनमा आगो लागेकोले उद्धार र दमकलको टोलीलाई उद्धार कार्यमा निकै समस्या भएको उनले बताए । पञ्जाबका मुख्यमन्त्री परवेज इलाहीले दुर्घटनाप्रति दुःख व्यक्त गर्दै घाइतेहरूलाई राम्रो उपचार गर्न सम्बन्धित स्वास्थ्य अधिकारीहरूलाई निर्देशन दिएका छन् । उनले दुर्घटनामा ज्यान गुमाएकाका परिवारलाई मृतकको पहिचान गरी सहयोग गर्न प्रशासनलाई आग्रह समेत गरेका छन् ।
पाकिस्तानको पञ्जाब प्रान्तमा शनिबार ट्रक र बस एक आपसमा ठोक्किँदा कम्तीमा १३ जनाको मृत्यु भएको छ । लाहोरबाट करिब ४०० किलोमिटर टाढा रहिम यार खान जिल्लामा विपरीत दिशाबाट आउँदै गरेको उखु बोकेको ट्रक बसमाथि पल्टिएको थियो । बसमा जम्मा १८ जना यात्रु सवार थिए । घाइतेहरुलाई नजिकैको अस्पतालमा भर्ना गरिएको छ ।