सोमालियाको हयात होटलमा आतङ्वादी आक्रमणः १० जनाको मृत्यु
प्रकाशित मिति : भाद्र ४, २०७९ शनिबार
सोमालियाको राजधानी मोगादिसुको एक होटलमा शुक्रबार अबेर राति भएको आतंकवादी आक्रमणमा परी १० जनाको मृत्यु भएको छ ।
प्रत्यक्षदर्शीहरूले मोगादिसुको हयात होटलमा भएको आक्रमणमा धेरै व्यक्ति घाइते भएको र सुरक्षा बलहरूले बालबालिकासहित धेरैलाई उद्धार गरेको बताए। प्रहरीका अनुसार बन्दुकधारीले होटल भित्र पस्नुअघि नै विष्फोट गराए । शनिबार बिहानै गोली चलेको आवाज पनि सुनिएको थियो ।
होटलमा लुकेका आक्रमणकारीहरूलाई सुरक्षा फौजले नियन्त्रणमा लिने प्रयास गरेका भए पनि कतिजना आक्रमणकारी त्यहाँ छन् भन्ने स्पष्ट भएको छैन । इस्लामिक चरमपन्थी समूह अल–शबाबले आक्रमणको जिम्मेवारी लिएको छ । होटलको स्वागतकक्ष बाहिर भुइँमा आफूले धेरै शव देखेको उद्धार गरिएका एकजनाले बताएका छन् । आक्रमणमा मारिएकाहरूको परिचय पनि खुलाइएको छैन ।