न्युयोर्कको क्वीन्समा महात्मा गान्धीको शालिक तोडफोड
प्रकाशित मिति : भाद्र ४, २०७९ शनिबार
न्युयोर्कको क्वीन्समा रहेको एक मन्दिर बाहिर महात्मा गान्धीको शालिक तोडफोड गरिएको छ । साउथ रिचमण्ड हिलको श्री तुलसी मन्दिरको अगाडि ६ जनाले हथौडा प्रयोग गरेर गान्धीको शालिक तोडफोड गरेका हुन् ।
भारतीय महावाणिज्य दूतावासले न्युयोर्कमा हिन्दू मन्दिर बाहिर महात्मा गान्धीको सालिक तोडफोडको कडा निन्दा गरेको छ । न्युयोर्कस्थित भारतीय कन्सुलेटले घृणित कार्यका लागि जिम्मेवार व्यक्तिहरूलाई जवाफदेही बनाउन अमेरिकी अधिकारीहरूसँग अनुरोध गरेको छ ।
‘न्युयोर्कको क्वीन्समा रहेको एक मन्दिर बाहिर महात्मा गान्धीको शालिक तोडफोडको कडा निन्दा गर्दछौँ । हामीले यस घृणित कार्यका लागि जिम्मेवार व्यक्तिहरूलाई जवाफदेही बनाउनको लागि पूर्ण अनुसन्धानको लागि अमेरिकी अधिकारीहरू समक्ष मुद्दा उठाएका छौंँ’, वाणिज्य दूतावासले एक विज्ञप्तिमा भनेको छ ।
उनीहरुले शालिकमा हिन्दीमा कुकुर लेखेर स्प्रे पेन्ट समेत गरेका थिए । शान्तिको प्रतिनिधित्व गर्ने गान्धीको शालिकलाई बनाएर तोडफोड गर्नु धेरै दुखको कुरा भएको मन्दिरका संस्थापक पण्डित महाराजले बताएका छन् ।
गान्धीको शालिक तोडफोड गर्नेहरु २५ देखि ३० बर्षभित्रका रहेका छन् । उनीहरु दुईवटा कारमा आएर शालिक तोडफोड गरेर भागेका थिए ।
तुलसी मन्दिरमा गान्धीको शालिक तोडफोड भएकोमा सिटीलाइन ओजोन पार्क सिभिलियन पेट्रोलले ट्वीट गर्दै दुख व्यक्त गरेको छ । यस्तो घटना पहिलो पटक नभएको र रोकिनुपर्ने भन्दै कुनै पनि धर्मप्रति घृणापूर्ण अपराध सह्य नहुने उल्लेख गरिएको छ ।
झण्डै दुई हप्ता अगाडि पनि एक व्यक्तिले सोही गान्धीको शालिकलाई धकेलेको थियो । यस्ता घृणाका घटना बढ्दै गएको उक्त क्षेत्रकी राज्य सांसद जेनिफर राजकुमारले बताएकी छिन् । उनले घटना अपमानजनक भएको बताएकी छिन् ।
