ताइवानकी राष्ट्रपतिले भनिन्- ‘आक्रमण गर्ने प्रयास गरे चीनले ठूलो मूल्य चुकाउनु पर्नेछ’
प्रकाशित मिति : भाद्र ७, २०७९ मंगलबार
ताइवानका राष्ट्रपति साई इङ-वेनले छ दशकअघि चीन र ताइवानबीच भएको युद्धको वार्षिकोत्सवको अवसरमा मंगलबार ताइवान आफ्नो रक्षाप्रति प्रतिबद्ध रहेको र आक्रमण गर्नेहरूले ठूलो मूल्य चुकाउनु पर्ने बताईन् ।
चीन-ताइवान युद्धमा, ताइवान सेनाले चिनियाँ आक्रमणकारीहरूलाई पराजित गर्यो। अमेरिकी सदनकी सभामुख न्यान्सी पेलोसीले ताइपेईको भ्रमण गरेपछि गत महिना ताइवान र चीनबीचको तनाव बढेको छ। पेलोसीको भ्रमणपछि चीनले ताइवान नजिकै अभ्यास गरेको थियो।
सन् १९५८ को अगस्टको अन्त्यमा चीन र ताइवानबीच भएको युद्धमा राष्ट्रपति साई इङ वेनले सैनिकहरूलाई भेटेर सैनिकहरूको बहादुरीको प्रशंसा गरिन् । उनले सेनाले ताइवानको रक्षा गरेर ताइवानी जनताको दृढ संकल्पलाई कसैलाई हल्लाउन नसक्ने सन्देश विश्वलाई दिएको दाबी गरिन् । ताइवानमा देशको रक्षा गर्ने दृढ संकल्प र तयारीका साथै आफ्नो रक्षा गर्ने क्षमता शत्रुले बुझ्नुपर्ने बताइन् ।
इङ वेनले ताइवानमा आक्रमण गर्ने वा आक्रमण गर्ने प्रयास गरेमा ठूलो मूल्य चुकाउनु पर्ने र अन्तर्राष्ट्रिय समुदायले यसको कडा निन्दा गर्ने बताइन् । उनले एकताबद्ध भएर लड्ने र विश्वलाई सन्देश दिने उल्लेख गरिन् ।
यसअघि राष्ट्रपतिले स्ट्यानफोर्ड युनिभर्सिटीको हुभर इन्स्टिच्युटमा पूर्व अमेरिकी अधिकारीहरूको प्रतिनिधिमण्डलसँग भेट गरेकी थिइन् । साई भनिन्, ‘सन् १९५८ को लडाईले वर्तमान ताइवानको लागि मार्ग प्रशस्त गर्यो।’
‘६४ वर्ष पहिले अगस्त २३ को लडाईमा, हाम्रा सैनिक र नागरिकहरूले ऐक्यबद्धता देखाए र ताइवानको रक्षा गरे,’ उनले भने। उनीहरुकै कारणले हामीसँग लोकतान्त्रिक ताइवान छ ।