इटालीमा आप्रवासी बोकेको डुङ्गा डुब्यो, ६० जनाको मृत्यु
प्रकाशित मिति : फाल्गुन १४, २०७९ आईतबार
क्षिणी इटालीको तटीय क्षेत्रमा डुङ्गा पल्टिँदा कम्तीमा ६० आप्रवासीको मृत्यु भएको छ । मृत्यु हुनेमा १२ बालबालिका रहेका छन् । त्यहाँ कैयौँ मानिसहरु बेपत्ता छन्।
इटालीको समाचार एजेन्सी आन्साले मृत्यु हुनेमा केही महिनाको बालक पनि रहेको बताएको छ । टर्कीबाट आप्रवासी कामदार लिएर आएको डुङ्गा समुद्रको बीचमा दुई टुक्रा भएको बताइएको छ ।
क्यालाब्रियाको क्रोटोन सहरको तटमा डुङ्गा रोकिन लाग्दा दुर्घटना भएको हो । इटालीका राष्ट्रपति सर्जियो माटारेल्लाका अनुसार डुङ्गामा सवार धेरै मानिस खराब अवस्थाबाट बच्न इटालीतर्फ गइरहेका थिए ।
डुंगामा अफगानिस्तान, पाकिस्तान, सोमालिया र इरानका नागरिक थिए । प्रशासनले खोजी तथा उद्धार कार्य जारी राखेको छ ।
यो डुंगामा कति जना सवार थिए भन्ने अहिलेसम्म थाहा हुन सकेको छैन । तर राहत र उद्धार कार्यमा संलग्न व्यक्तिहरूले समाचार एजेन्सी एएफपीलाई उक्त डुङ्गामा २०० भन्दा बढी यात्रु रहेको बताएका छन् ।
यसको मतलब कम्तीमा ६० जना अझै बेपत्ता हुन सक्छन्। सोही क्रममा घटनास्थलमा पुगेका इटालीका गृहमन्त्री माटेओ पियानतेडोसीले कम्तीमा ३० जना अझै बेपत्ता रहेको बताएका छन् ।
कोस्टगार्डले ८० जनाको जीवितै उद्धार गरिएको जनाएको छ । धेरै मानिसहरु कुनै न कुनै रुपमा पौडी खेलेर भाग्न सफल भएका छन् ।
हरेक वर्ष ठूलो संख्यामा मानिसहरू गरीबी र युद्धबाट भागेर अफ्रिकी देशहरूबाट गोप्य रूपमा इटाली पुग्छन्। यो अवधिमा डुंगा डुब्दा धेरै पटक यस्ता दुर्घटना हुने गरेको छ ।
