अमेरिकी प्रथम महिला र विदेशमन्त्रीबाट ह्वाइटहाउसमा भूमिका श्रेष्ठ र मुस्कान खातुनको स्वागत
प्रकाशित मिति : फाल्गुन २५, २०७९ बिहीबार
अन्तर्राष्ट्रिय साहसी महिला पुरस्कार प्राप्त गरेका भूमिका श्रेष्ठ र मुस्कान खातुनले अन्तर्राष्ट्रिय नारी दिवसको अवसरमा ह्वाइटहाउसमा आयोजना गरिएको कार्यक्रममा अमेरिकी प्रथम महिला जिल बाइडेन र विदेशमन्त्री एन्टोनी ब्लिंकेनलाई भेटेको नेपालस्थित अमेरिकन दुताबासले जनाएको छ ।
अमेरिकी विदेश मन्त्रालयले सन् २००७ मा विश्वभरका महिलाहरूको जीवनमा उल्लेखनीय परिवर्तन ल्याउने महिलाहरूलाई सम्मान गर्ने उद्देश्यले उक्त पुरस्कार स्थापना गरेको थियो । यसअघि कोभिड-१९ सँग सम्बन्धित प्रतिबन्धका कारण उनीहरू दुई जनाले वासिंटनमा भौतिक रूपमा कार्यक्रममा भाग लिन पाएका थिएनन् ।
भूमिकाले लैंगिक अल्पसंख्यक समुदायको जीवनस्तर सुधारप्रतिको आफ्नो समर्पणका लागि गत वर्ष पुरस्कार प्राप्त गरेकी थिइन् । सन् २०२१ मा मुस्कानलाई तेजाब आक्रमण अन्त्य गर्ने कामका लागि पुरस्कृत गरिएको थियो ।