विश्वकपको दौडबाट बाहिरियो वेस्ट इन्डिज, स्कटल्याण्डसँग ७ विकेटले पराजित
प्रकाशित मिति : असार १६, २०८० शनिबार
विश्वकप छनोट अन्तर्गतको खेलमा स्कटल्याण्डले वेस्ट इन्डिजलाई ७ विकेटले पराजित गरेको छ । यो हारसँगै वेस्ट इन्डिजको टोली विश्वकप २०२३ को दौडबाट बाहिरिएको छ ।
सुपर ६ राउण्डको खेलमा स्कटल्याण्डले टस जितेर बलिङ रोजेको थियो । पहिले ब्याटिङ गरेको वेस्ट इन्डिजको टोली १८१ रनमा अलआउट भयो ।
वेस्ट इन्डिजका लागि जेसन होल्डरले सर्वाधिक ४५ रनको योगदान दिए । योसँगै स्कटल्याण्डका लागि ब्रान्डन म्याकमुलनले सर्वाधिक ३ विकेट लिए ।
१८२ रनको लक्ष्य पछ्याएको स्कटल्याण्डको टोलीको सुरुवात राम्रो हुन सकेन र ओपनर क्रिस्टोफर म्याकब्राइड खाता नखोल्दै आउट भए ।
त्यसपछि विकेटकिपर ब्याट्सम्यान म्याथ्यु क्रस र अलराउन्डर ब्रान्डन म्याकमुलनले इनिङ्सलाई सम्हालेका थिए। म्याकमुलनले ६९ रनको इनिङ खेले भने क्रसले ७४ रन बनाए ।
ब्रेन्डन म्याकमुलन आफ्नो अलराउन्ड प्रदर्शनका लागि प्लेयर अफ द म्याच घोषित भए।