भावुक प्रधानमन्त्री प्रचण्डमाथि लगातार बज्रपात, १६ वर्षमा ४ प्रीय मान्छेलाई गुमाए
प्रकाशित मिति : असार २७, २०८० बुधबार
पछिल्लो समय प्रधानमन्त्री पुष्पकमल दाहाल प्रचण्ड स–साना कुरामा पनि भाबुक हुने गर्दछन् । दश वर्षे शसस्त्र द्वन्द्वको कमाण्ड सम्हालेका वर्तमान प्रधानमन्त्री तथा नेकपा माओवादी केन्द्रका अध्यक्ष पुष्पकमल दाहाल प्रचण्ड शान्ति प्रक्रिया पछि पनि भित्रि मन देखि खुशी छैनन् । दश वर्ष सम्म शसस्त्र युद्धको नेतृत्व गरेका उनै कमाण्डर प्रचण्ड पछिल्लो केही वर्षदेखि राम्ररी निदाउन पनि सकेका छैनन् । यसको पछाडीको एउटै कारण हो– परिवारमा लगातार परेको बज्रपात ।
शसस्त्र जनयुद्धबाट शान्ति प्रक्रियामा आएको १६ वर्षको अवधिमा प्रचण्डले जन्मदिने बुबासहित परिवारका चार सदस्य गुमाएका छन् । प्रचण्डले आफैले जन्माएका दुइ छोराछोरी चितामा जलीरहेको स्वयं आफैले देखिसकेका छन् । प्रचण्डले २०७० चैत १३ मा जेठी छोरी ज्ञानु केसीलाई गुमाए । छोरी ज्ञानुको निधनपछि विक्षिप्त बनेका प्रचण्डमाथि करिब ४ वर्षपछि पुनः अर्को बज्रपात आइलाग्यो । २०७४ मंसिर ३ गते छोरा प्रकाश दाहालले पनि प्रचण्डको साथ छोडेर कहिल्यै नफर्किने गरि संसारबाट बिदा लिए ।
आखाँ अगाडी दुइ सन्तानलाई गुमाएका प्रचण्डले श्रीमति सीता दाहाललाई पनि गुमाउन पुगेका छन् । सँगै जीउने–मर्ने कसम खाएर २०२६ साल वैशाखमा मागी विवाह गरेकी सीताले पनि साथ छोडेपछि प्रचण्डमा झन पीडा र एक्लोपन थपिएको छ । १० वर्षको अन्तरालमा आफ्नो जीवनका ३ प्रिय मान्छेलाई गुमाउनुको पीडा प्रचण्डको अनुहारमा झलझली देखिन्छ ।
माध्यमिक विद्यालयको शिक्षकदेखि प्रधानमन्त्रीसम्मको यात्रामा अनवरत् साथ र हात दिने सहयात्री सीता अब प्रचण्डको अगाडी हुने छैनन् । मुलुकमा गणतन्त्रको स्थापनाको लागि भएको जनयुद्धको समयमा सफलतामा पुर्याउन आफ्नो जीवन नै बाजी लगाएर सहयोग पुर्याएकी सीता सधैंको लागि अस्ताएकी छन् । ६ वर्षअघि छोरा प्रकाशको शब निकालेकै अस्पतालबाट बुधबार प्रचण्डले पत्निको शब निकालेका छन् ।
बाल्यकाल होस् या किशोरावस्थामा छोराछोरीसँग राम्ररी समय बिताउन नपाएका प्रचण्डले श्रीमति संँगको साथ पनि गुमाउन पुगेका छन् । प्रचण्डलाई अब परिबारको रुपमा छोरीहरु रेणु र गंगाको मात्रै साथ मिल्नेछ । छोरी ज्ञानु र छोरा प्रकाशको निधनको वियोग भुलिनसकेका प्रचण्ड पुनः पत्नी शोकमा परेका हुन् । देशको कार्यकारी प्रमुखको हैसियतले सुशासन र भ्रष्टाचार नियन्त्रणलाई प्राथमिकता लिएर मुलुक बनाउने अभियानमा लागेको प्रचण्ड पारिबारीक रुपमा भने कमजोर र विक्षिप्त बन्दै गएका छन् ।