इजरायलमा भएको आक्रमणमा परि १० जना नेपालीको मृत्यु
प्रकाशित मिति : आश्विन २१, २०८० आईतबार
हमासले इजरायलमाथि गरेको आक्रमणमा परि १० जना नेपालीको मृत्यु भएको छ । इजरायलस्थित नेपाली दुतावासले दिएको जानकारी अनुसार आक्रमणमा परेका १७ जना नेपाली मध्ये १० जना नेपालीको मृत्यु भएको हो । १ जना नेपाली अझै सम्पर्कमा आएका छैनन् ।
मृत्यु हुनेमा कैलालीका नारायण न्यौपाने र आशिष चौधरी, बझाङका गणेशकुमार नेपाली, दार्चुलाका दिपेशराज विष्ट र लोकेन्द्र सिंह धामी, धनुषाका आनन्द साह र सुनसरीका राजेशकुमार स्वर्णकार छन् । यस्तै, डोटीका राजन फुलारा र पदम थापा, सल्यानका प्रवेश भण्डारीको मृत्यु भएको छ ।
आक्रमणबाट घाइते नेपाली मध्ये अस्पतालमा ४ जना उपचाररत रहेका छन् । दुई जना भने सुरक्षित छन् ।
घाइते हुनेमा गोरखाका हिमाञ्चल कट्टेल, सल्यानका विधान सेजुवाल, दाङका प्रविण डाँगी, कैलालीका धनबहादुर चौधरी रहेका छन् । उनीहरुको स्थानीय अस्पतालमा उपचार भइरहेको छ ।
त्यस्तै, इजरायलमा रहेको नेपाली दूतावासले दिएको जानकारी अनुसार सल्यानका प्रमोद केसी फार्म हाउस मामिकको घरमा र कैलालीका वीरेन्द्र चौधरी इजरायलको सुरक्षा पोष्टमा सुरक्षित अवस्थामा छन् ।
कञ्चनपुरका बिपिन जोशी अझै सम्पर्कमा आएका छैनन् ।