विनाभिसा आएर अमेरिका र मेक्सिको सीमानाको पर्खालबाट अमेरिकातिर हाम्फाल्ने १० घाइते
प्रकाशित मिति : फाल्गुन २०, २०८० आईतबार
विनाभिसा सिमाक्षेत्रमा आएर अमेरिका र मेक्सिको सीमानाको पर्खालबाट अमेरिकातिर हामफाल्ने खोज्दा खसेपछि घाइते भएका १० जना आप्रवासीहरुलाई अस्पताल भर्ना गरिएको क्यालिफोर्नियाका अधिकारीहरूले बताएका छन् । उनीहरु अमेरिका र मेक्सिको सिमानामा रहेको ३० फिट अग्लो पर्खालबाट खसेर घाइते भएका हुन् ।
सीमा गस्ती एजेन्टहरूले सान डिएगो नजिकैको टिवाना नदी उपत्यकामा शनिबार बेलुका ४ बजे घाइते आप्रवासीहरूलाई फेला पारेका थिए । सान डिएगो फायर रेस्क्यु डिपार्टमेन्टका अग्निनियन्त्रकहरूले उनीहरुलाई उपचारका लागि अस्पताल लगेका छन् । जसमध्ये केहीको हड्डी भाँचिएको जनाइएको छ ।
त्यहाँ केही बच्चाहरू पनि रहेको तथा ती बच्चाहरूलाई अभिभावकसँग सहरका ट्रमा सेन्टरहरूमा लगिएको जनाइएको छ । बोर्डर फिल्ड स्टेट पार्क नजिकैको ३० फिट अग्लो पर्खालमा चढेका तर नखसेका अरू धेरैलाई सीमा गस्ती एजेन्टहरूले नियन्त्रणमा लिएका थिए ।
सन् २०२३ मा सीमा क्षेत्रका अस्पतालहरूले सीमा पर्खाल चढ्ने प्रयास गर्दा घाइते भएका आप्रवासीहरु प्रति दिन औसत एकजनाको हिसाबले उपचार गरेको तथ्याक रहेको छ । पर्खालबाट खस्नेहरुको मृत्युदर अत्यन्तै उच्च रहेको छ ।
सन् २०२२ मा मात्र यसरी पर्खाल चढ्न खोज्ने खसेर ९ जनाको मृत्यु भएको थियो भने अरु ३२६ जना घाइतेको उपचार गरिएको थियो । सन् २०२३ को जनवरीदेखि अक्टोबरसम्म ३४५ जना खसेर घाइते भएको रेकर्ड रहेको छ । जसमध्ये अक्टोबरमा मात्र ७० जना घाइते भएका थिए ।
ट्रम्प प्रशासनले सान डिएगो क्षेत्रमा रहेको १८ फुट अग्लो पर्खालका स्थानमा ३० फुट अग्लो पर्खाल लगाएको थियो । यो पर्खाल चढ्न त निकै मुस्किल रहेको छ तर चढ्न खोज्नेहरुको संख्या उल्लेख्य रहेकाले त्यसक्षेत्रका अस्पतालहरु भरिने गरेका छन् ।