इन्डोनेशियामा १५३ यात्रु बोकेको विमानका दुबै पाइलट निदाएपछि जागिरबाटै निलम्बन
प्रकाशित मिति : फाल्गुन २८, २०८० सोमबार
१५० भन्दा धेरै यात्रु बोकेको इन्डोनेसियाली एयरलाइन्सको विमान उडिरहेको बेलामा दुबैजना पाइलटहरु निदाएपछि ती दुबै पाइलटलाई निलम्बन गरिएको छ । उक्त बिमानका दुई पाइलट निदाएपछि बिमान आफ्नो बाटोबाट बाहिर गएको थियो ।
यो घटना जनवरी २५ मा केन्डारीको हलु ओलियो एरपोर्ट र जकार्ताको सोएकर्नो हटृा अन्तर्राष्ट्रिय विमानस्थलको बाटिक एयर इन्डोनेसियाको उडानमा भएको थियो । घटनाबारे यातायात मन्त्रालयले छानविन सुरु गरेको छ ।
जकार्ताबाट केन्डारी उडानको क्रममा अहिलेसम्म कुल १६ सय घण्टामात्र उडान गरेका २८ बर्षका पाइलटले आफूले उचित आराम नगरेको अर्का मुख्य पाइलटलाई बताएका थिए ।
त्यसपछि लगभग अहिलेसम्म कुल ६३०० घण्टा उडान गरेका ३२ वर्षीय मुख्य पाइलटले दोश्रो पाइलटलाई यात्राको क्रममा लगभग आधा घण्टा आराम गर्ने अनुमति दिएका थिए ।
त्यसपछि उनी ब्यूझेपछि मुख्य पाइलटलाई आराम गर्ने अनुमति दिएका थिए । मुख्य पाइलट निदाएको लगभग २० मिनेट पछि दोश्रो पाइलट पनि अचानक निदाएका थिए । त्यतीबेला विमान लगभग ३६०० फिटको उचाइमा थियो भने विमानमा १५३ यात्रुहरु र चालकदलका ४ सदस्यहरु थिए ।
एयर ट्राफिक कन्ट्रोलरले निदाइरहेका पाइलटहरुसँग सम्पर्क गर्ने प्रयास गरिरहदा असफल भएका थिए । अन्तिम पटक सम्पर्क भएको २८ मिनेट पछि मुख्य पाइलट ब्युँझिएका थिए भने उनी तुरुन्तै विमान सही उडान मार्गमा नरहेकोबारे सचेत भएका थिए ।
मुख्य पाइलटले त्यसपछि दोश्रो पाइलट सुतेको देखेपछि जगाएका थिए ।
त्यसपछि मुख्य पाइलटले जाकार्ता एयर कन्ट्रोलको कलको जवाफ दिएका थिए । पाइलटले रेडियो कम्युनिकेसनको समस्या भएको र हाल समस्या समाधान भएको ताएका थिए । त्यसपछि उडान जारी राखिएको थियो र जकार्तामा अवतरण गरिएको थियो ।
घटनामा कोहीपनि घाइते नभएको र विमानमा कुनै क्षत्ति नभएको जनाइएको छ । मुख्य पाइलटका लागि उडान अगाडि ३५ घण्टा र दोश्रो पाइलटका लागि ५३ घण्टा आरामका लागि समय दिइएको थियो । दोश्रो पाइलट दुई महिनाका जुम्ल्याहाका पिता रहेको र दुईदिन अगाडि घर सरेको जनाइएको छ । बच्चाको हेरचाह गर्ने क्रममा राम्रोसँग सुत्न नसकेकाले उडानमा थाकेको उनले अनुसन्धानकर्ताहरुलाई बयान दिएका थिए ।
