विश्व सुचकांकमा नेपालीहरु दक्षिण एसियामा सबैभन्दा धेरै खुशी
प्रकाशित मिति : चैत्र ७, २०८० बुधबार
विश्व सुचकांकमा नेपालीहरु दक्षिण एसियामा सबैभन्दा धेरै खुशी देखिएका छन् । मार्च २० अर्थात् अन्तर्राष्ट्रिय खुशी दिवसका अवशरमा विश्वका खुसी देशबारे सार्वजनिक सन् २०२४ को ग्यालप वर्ल्ड रिपोर्ट अनुसार नेपालीहरु दक्षिण एसियामा सबैभन्दा धेरै खुशी देखिएका हुन् । यो रिपोर्टले खुशीको स्तरको आधारमा देशहरूको वर्गीकरण गर्दछ । रिपोर्टमा समावेश दक्षिण एसियाका अन्य देशलाई नेपालीले उछिनेका छन् ।
नेपाल सुचीमा ९३ औं नम्बरमा रहेको छ भने स्कोर ५ दशमलव १५८ रहेको छ । सुचीमा इन्डिया १२६ नम्बरमा छ भने बंगलादेश १२९ औं नम्बरमा छ । त्यस्तै पाकिस्तान १०८ औं नम्बरमा छ भने श्रीलंका १२८ औं नम्बरमा छ । दक्षिण एसियाको अफगानिस्तान विश्वको सबैभन्दा दुखी देश बनेको छ । सुचीमा अफगानिस्तान अन्तिम अर्थात १४३ औं नम्बरमा छ, जसको स्कोर १ दशमलव ७२१ रहेको छ । रिपोर्टमा भुटान र माल्दिभ्सलाई समावेश गरिएको छैन ।
नेपाल ३० बर्ष मुनिका मानिसहरुमा खुशीका लागि पनि ९२ नम्बरमा छ तर ६० बर्ष माथिकाहरुका लागि भने ७६ नम्बरमा रहेको छ । ३० देखि ४५ बर्षसम्मका उमेरका व्यक्तिका लागि नेपाल खुशीमा १०१ नम्बरमा छ भने ४५ देखि ६० बर्षसम्मका व्यक्तिका लागि ७६ नम्बरमा छ । सन् २००६ देखि २०१० को तुलनामा सन् २०२१ देखि २०२३ मा नेपालीहरु बढी दुखी देखिएका छन् ।
फिनल्याण्ड लगातार सातौं वर्षको लागि विश्वको सबैभन्दा खुशी देश घोषित भएको छ भने फिनल्याण्डको स्कोर ७ दशमलव ७४१ रहेको छ । खुशी देशहरुको टपटेनमा क्रमशः फिनल्याण्ड, डेनमार्क, आइसल्याण्ड, स्वीडेन, इजरायल, नेदरल्याण्डस, नर्वे, लक्जेम्बर्ग, स्वीट्जरल्याण्ड र अष्ट्रेलिया रहेका छन् । बेलायत २० र अमेरिका २३ नम्बरमा परेका छन् ।
निष्कर्षमा पुग्न वैज्ञानिकहरूले गत तीन वर्षहरूमा ग्यालप वर्ल्ड पोलमा भाग लिएका १४३ राष्ट्रका मानिसहरूबाट प्राप्त सर्वेक्षण प्रतिक्रियाहरू जाँच गरेका थिए । बासिन्दाहरूलाई उनीहरूको जीवन सन्तुष्टिलाई शून्य देखि १० को स्केलमा मूल्याङ्कन गर्न सोधिएको थियो, उनीहरूको जवाफले देशको श्रेणी निर्धारण गर्दछ। त्यसपछि विशेषज्ञहरूले औषत आयु, उदारता, जीडीपी जस्ता कारकहरूको विश्लेषण गरेका थिए ।
यस वर्ष पहिलो पटक रिपोर्टले उमेर समूहहरूमा खुशी, स्वास्थ्य वा समृद्धी कसरी फरक हुन्छ भन्ने कुरामा पनि ध्यान केन्द्रित गरेको छ। ती खोजहरूको आधारमा छुट्टाछुट्टै सूचीहरू सिर्जना गरिएको थियो । उदाहरणका लागि लिथुआनिया ३० वर्ष मुनिका मानिसहरूमा खुशीको लागि नम्बर १ मा आयो, तर समग्रमा १९ औं स्थानमा थियो। विश्लेषकहरूले ती प्रवृत्तिहरूमा परिवर्तनहरू निर्धारण गर्न सन् २००६ सम्मको तथ्यांकसम्म गएका थिए ।