टी २० विश्वकप : सुपर ८ को दोश्रो खेलमा इंग्ल्यान्ड विजयी , आज भारत र अफगानिस्तानबिच खेल हुने
प्रकाशित मिति : असार ६, २०८१ बिहीबार
टी २० विश्वकप २०२४ को सुपर ८ अन्तर्गत आफ्नो पहिलो खेलमा इंग्ल्यान्ड विजयी भएको छ । उसले वेस्ट इन्डिज लाई ८ विकेटले पराजित गरेको हो ।
फिल साल्ट र जोनी विस्ट्रोको शतकिय साझेदारीमा इंग्ल्यान्डले आईसीसी टी–२० विश्वकपको सुपर ८ मा वेस्ट इन्डिजमाथि ८ विकेटको सानदार जित दर्ता गरेको छ।
जितसँगै इंग्ल्यान्ड समूह ‘बी’ को शीर्ष स्थानमा उक्लेको छ। दक्षिण अफ्रिका दोस्रो स्थानमा छ। अंक विहीन अमेरिका तेस्रो र वेस्ट इन्डिज चौथो स्थानमा छन्।
वेस्ट इन्डिजले दिएको १८१ रनको लक्ष्य इंग्ल्यान्डले २ विकेटको क्षतिमा भेटायो । लक्ष्य भेटाउने क्रममा ओपनर फिल साल्टले ८७ र जोनी बेयरस्टोले ४८ रनको अविजित पारी खेले ।
वेस्ट इन्डिजका आन्द्रे रसेल र रोस्टन चेशले एकरएक विकेट लिए । यसअघि टस हारेर पहिले ब्याटिङ गरेको वेस्ट इन्डिजले ४ विकेटको क्षतिमा १८० रन बनाएको थियो ।
वेस्ट इन्डिजको जारी विश्वकपमा पहिलो हार हो । समूह चरणमा सबै चार खेलमा अपराजित हुँदै सुपर ८ मा आइपुगेको थियो ।
इंग्ल्यान्ड र वेस्ट इन्डिज सुपर ८ को समूह २ मा छन् । यो समूहमा अरु दुई टोली अमेरिका र साउथ अफ्रिका रहेका छन् ।
बुधबार भएको सुपर ८ को पहिलो खेलमा अमेरिकालाई १८ रनले दक्षिण अफ्रिकाले पराजित गरेको थियो । बिहिबार साँझ भारत र अफगानिस्तानबिच खेल हुनेछ ।
