१५ शय्याको अस्पताल भवन एक वर्षदेखि अलपत्र
प्रकाशित मिति : श्रावण ९, २०८१ बुधबार
गुल्मी दरबार गाउँपालिकास्थित पन्ध्र शय्याको अस्पताल भवन अलपत्र परेको छ ।
तोकिएको मितिमा निर्माण सम्पन्न गरिए पनि भुक्तानी समस्याले गाउँपालिकाको अस्पताल भवन एक वर्षदेखि अलपत्र परेको हो ।
निर्माण व्यवसायीलाई भवन निर्माण गरेको बाँकी रकम भुक्तानी गर्न आवश्यक बजेट नआएका कारण भवनको स्वामित्व हस्तान्तरणसमेत हुनसकेको छैन ।
जिल्लाका कतिपय पालिकामा निर्माण व्यवसायीले समयमा काम नगर्दा भवन निर्माण हुननसकेको अवस्थामा यहाँ समयमै निर्माण हुँदासमेत भवन प्रयोगविहीन छ ।
बिकोई अर्जुन न्यूलिजा जेबीद्वारा १२ करोड ९४ लाख ५६ हजार लागतमा गत वर्ष तोकिएको अवधि मै भवन निर्माणको काम सम्पन्न भएको अर्जुन बिल्र्डस एण्ड कन्र्टक्सनका सञ्चालक विजय खनालले बताउनुभयो ।
उहाँले गाउँपालिकाले सबै रकम भुक्तानी नदिए पनि भवन सम्पन्न भइसकेकाले स्वामित्व हस्तान्तरण गर्न चाहे पनि पालिकाले नमानेको बताउनुभयो ।
गुल्मीदरबार गाउँपालिका–३ को धुरेलडाँडामा १५ शय्याको अस्पताल भवन एकवर्ष अघि नै निर्माण सम्पन्न भएको हो । निर्माण व्यवसायीले रु एक करोड २० लाखभन्दा बढी रकम अझै भुक्तानी पाउन बाँकी छ ।
गुल्मीदरबार गाउँपालिका अध्यक्ष सरोजकुमार थापाले रकम निकासाका लागि मन्त्रालयमा पटकपटक पत्राचार र कुरा गरिए पनि ढिलाइ भएको जानकारी दिनुभयो ।
उहाँले रकम भुक्तानी गर्न बाँकी भएकाले आफूहरूले स्वामित्व नलिए पनि अब भने चाँडै प्रक्रिया अगाडि बढ्ने बताउनुभयो ।
जिल्लाका अन्य स्थानीय तहमा १५ शय्याका अस्पताल भवन निर्माण भइरहेका छन् । निर्माणाधीन अवस्थामा रहेका ती भवनको काम भने सुस्त गतिमा अघि बढिरहेको छ ।