एकल पुरुषलाई दिइएको २३ लाख भत्तामा अख्तियारको आँखा
प्रकाशित मिति : भाद्र ५, २०८१ बुधबार
इलामको देउमाई नगरपालिकाले १ सय ९८ जना एकल पुरुषलाई भत्ता दिएको छ । नगरपालिकाले एकल पुरुषलाई भत्ता दिदा २३ लाख २७ हजार रुपैया खर्र्च भएको बताएको हो ।
सामाजिक सुरक्षा भत्ता वापत आर्थिक वर्ष २०८०/८१ मा उनीहरूले उक्त रकम पाएका हुन् ।
देउमाईले नगरभित्रका ६० वर्ष पुगेका अविवाहित, पत्नीसँग सम्बन्धविच्छेद भई विवाह नगरेका ६० वर्ष पुगेका र पत्नीको मृत्यु भई अर्को विवाह नगरेका ६० वर्ष पुगेका पुरुषलाई १ हजार मासिक भत्ता वितरण गरिएको हो ।
देउमाईले आर्थिक वर्ष २०७९÷८० मा नगरक्षेत्रका २ सय ७ जना एकल पुरुषलाई २४ लाख ८४ हजार सामाजिक सुरक्षा भत्ता उपलब्ध गराएको थियो ।
देउमाईले ‘एकल पुरुष भत्ता वितरण सम्बन्ध कार्यविधि’ पारित गरी एकल पुरुषलाई भत्ता वितरण गरेको लेखा अधिकृत गजेन्द्र एक्तेनले जानकारी दिनुभयो ।
त्यसैगरी, आर्थिक बर्ष २०८०/८१ मा ४५ वर्ष पुगेका अविवाहित ९१ महिलालाई १० लाख ८९ हजार सामाजिक सुरक्षा भत्ता प्रदान गरिएको छ । उनीहरुलाई पनि मासिक १ हजारका दरले भत्ता दिइएको हो ।
‘सामाजिक सुरक्षा कार्यक्रम अन्तर्गत वितरण गर्दै आएको एकल पुरुष भत्ता, एकल महिला भत्ता (४५ वर्षमाथि), तेस्रो लिङ्गी भत्ता, ‘ग’ वर्ग अपाङ्गता भत्ता र ज्येष्ठ नागरिक पोशाक भत्ता वितरण कार्यक्रम अहिले भने स्थगन गरेको हो ।
सामाजिक सुरक्षा भत्ता वितरण नगर्न अख्तियार दुरुपयोग अनुसन्धान आयोगको निर्देशन र सङ्घीय मामिला तथा सामान्य प्रशासन मन्त्रालयको पत्र प्राप्त भएपछि कार्यपालिका बैठकको निर्णयानुसार अर्को निर्णय नभएसम्मका लागि सामाजिक सुरक्षा कार्यक्रम स्थगन गरिएको छ ।
