रामेछापमा पहिरोले घर बगाउदा २ को मृत्यु , ८ जनाको खोजी चल्दै
प्रकाशित मिति : भाद्र ८, २०८१ शनिबार
रामेछापमा पहिरोमा पु्रिएर २ जनाको मृत्यु भएको छ । आठ जना बेपत्ता भइका छन । दोरम्बा शैलुङ गाउँपालिकाको वडा नम्बर ३ लेखर्कमा पहिरोमा पुरिएर २ जनाको मृत्यु भएको हो । आठ जना हराइरहेका प्रहरीले बताएको हो ।
गएराति १० बजेतिर झरेको पहिरोले ६ वटा घर बगाएको हो । गाउँपालिकाका उपाध्यक्ष खमला थापामगरका अनुसार चण्डिका थापामगर र एउटा बालकको शव भेटिएको छ । अरू आठ जना हराइरहेका छन ।
घरकै नाम निशान नभएकाले हराइरहेका मानिस खोज्न पनि समस्या भएको प्रहरीको भनाइ छ । पहिरोले ३ वटा घर बगाएर अँधेरी खोलामा पुर्याएको बताइएको छ ।
जिल्ला प्रहरी कार्यालय रामेछापका सूचना अधिकारी कौशल न्यौपानेका अनुसार गएराति परेको भीषण वर्षाका कारण गाउँ नजिकै रहेको खोलाको कटानले पहिरो खसेको थियो ।
घटनास्थलमा प्रहरी टोली पुगेर कम्तीमा ३ घर बगाएको र २ जनाको शव घटनास्थलमा निकालिएको उहाँले बताउनु भयो ।
पहिरोपछिको बाढीले एउटा पक्की पुल पनि बगाएको छ । अहिले घटनास्थलमा नेपाली सेना र नेपाल प्रहरी पुगेर खोजी शुरु गरेका छन् ।