रुसद्वारा युक्रेनमा मिसाइल र ड्रोन आक्रमण, ५ जनाको मृत्यु
प्रकाशित मिति : भाद्र १०, २०८१ सोमबार
रुसले सोमबार युक्रेनमा मिसाइल र ड्रोन आक्रमण गरेको छ । उक्त आक्रमणमा परी ५ जनाको ज्यान गएको छ ।
यसबारे युक्रेनी राष्ट्रपति भोलोडिमिर जेलेन्स्कीले रुसले आक्रमणका लागि १०० भन्दा बढी मिसाइल र १०० ड्रोन प्रयोग गरेको बताएका छन् । यी आक्रमणहरू कीभ, खार्किभ, ओडेसा र पश्चिमी क्षेत्रहरूमा गरिएका हुन् ।
युक्रेनका प्रधानमन्त्री डेनिस श्मिहलले देशका १५ क्षेत्रका धेरै सहरमा विस्फोट भएको बताएका छन्। उनले युक्रेनको ऊर्जा पूर्वाधार लक्षित रुसले आक्रमण गरेको बताएका छन् । यसैलाई मध्यनजर गर्दै हवाई आक्रमणको अलर्ट जारी गरिएको छ ।
युक्रेनी वायुसेनाले रुसले लगातार हवाई हमला गरिरहेको बताएको छ । युक्रेन कुर्स्क क्षेत्रमा धेरै ठाउँमा प्रवेश गरिसकेको बेला रुसले आक्रमण गरेको हो ।
रुसले २०२२ फेब्रुअरी २४ मा युक्रेनमा हमला गरेको थियो । त्यसयता दुई देशबीच युद्ध चलिरहेको छ ।