युक्रेनमा रुसको घातक हमला , ५१ जनाको मृत्यु , २ सय बढी घाइते
प्रकाशित मिति : भाद्र १८, २०८१ मंगलबार
युक्रेनमा भएको रुसी मिसाइल आक्रमणमा ५१ जनाको मृत्यु भएको छ । २ सय १९ जना घाइते भएका छन् ।
युक्रेनको मध्यपूर्वी क्षेत्रमा एक सैन्य तालिम केन्द्र र नजिकैको अस्पतालमा दुई वटा रुसी ब्यालेस्टिक क्षेप्यास्त्र प्रहार भएको युक्रेनका राष्ट्रपति भोलोदिमर जेलेन्स्कीले बताउनुभयो ।
अधिकारीहरूले आक्रमण पोल्टावा सहरमा भएको बताए । पोल्टावा किएभबाट करिब ३ सय ५० किलोमिटर दक्षिणपूर्वमा रहेको छ ।
रुसको सीमा नजिकै रहेको यो सहर किएभ र युक्रेनको दोस्रो सबैभन्दा ठूलो सहर खार्किभ बीचको मुख्य राजमार्ग र रेलमार्गमा छ ।
नौ सय दिनभन्दा पनि धेरैअघि सन् २०२२ फेब्रुअरी २४ मा युद्ध सुरु भएपछि यो आक्रमण रुसी सेनाले गरेको सबैभन्दा घातक आक्रमण भएको देखिन्छ ।
धेरै मानिस बम आश्रय स्थलतर्फ जाँदै गर्दा हवाई आक्रमणको चेतावनी जारी भएलगत्तै क्षेप्यास्त्रहरू प्रहार भएका थिए ।
युक्रेनको रक्षा मन्त्रालयले आक्रमणलाई ‘बर्बरतापूर्ण’ भनेको छ । उद्धार टोली र चिकित्सकहरूले २५ जनालाई बचाएको रक्षा मन्त्रालयले विज्ञप्तिमा बताएको छ ।
तीमध्ये ११ जनालाई भग्नावशेषबाट बाहिर निकालिएको थियो । पोल्टावाका गभर्नर फिलिप प्रोनिनले बुधबारदेखि तीन दिने शोकको घोषणा गर्नुभएको छ ।
रुसी राष्ट्रपति भ्लादिमिर पुटिनले मङ्गोलियाको भ्रमण गरेकै दिन उक्त आक्रमण भएको हो । कथित युद्ध अपराधमा अन्तर्राष्ट्रिय वारेन्टमा पुटिनलाई पक्राउ गर्ने मागलाई मङ्गोलियाले ध्यान दिने कुनै सङ्केत थिएन ।
युक्रेनी राष्ट्रपति जेलेन्स्कीले पश्चिमी साझेदारहरूसँग सैन्य सहायताको तत्काल डेलिभरी सुनिश्चित गर्नका लागि आफ्नो अपिललाई दोहोर्याउनुभयो । यसअघि उहाँले अमेरिका र युरोपेली मुलुकहरूसँग सहयोगको आफ्नो वाचाहरू पूरा गर्न ढिलो भएको भन्दै आलोचना गर्नुभएको थियो ।