ट्रम्पको हत्या प्रयास गर्नेमाथि बन्दुक अपराधको अभियोग लगाइयो , आरोपहरु थपिनसक्ने
प्रकाशित मिति : भाद्र ३१, २०८१ सोमबार
अमेरिकाका पूर्वराष्ट्रपति डोनाल्ड ट्रम्पको हत्या गर्ने योजना बनाएको आशङ्कामा एक व्यक्तिमाथि सोमबार सङ्घीय बन्दुक अपराधको अभियोग लगाइएको छ ।
अन्ठाउन्न वर्षीय रेयान वेस्ले राउथमाथि दोषी अपराधीका रूपमा बन्दुक राखेको र उनको प्रारम्भिक अदालतमा उपस्थित हुने क्रममा विलुप्त सिरियल नम्बरका साथ बन्दुक राखेको अभियोग लगाइएको थियो ।
पूर्वराष्ट्रपति ट्रम्पलाई उहाँको वेस्ट पाम बिच गल्फ कोर्समा गोली हान्ने असफल प्रयासपछि आइतबार पक्राउ परेका राउथले पछि अदालतमा थप आरोपहरूको सामना गर्ने अपेक्षा गरिएको छ ।
अदालतको संक्षिप्त सुनुवाइका क्रममा राउथ शान्त देखिएका थिए । उनले फ्लोरिडाको दक्षिणी जिल्लाका जिल्ला न्यायाधीश रायन म्याककेबका धेरै प्रश्नमा सुस्त स्वरमा ‘हो’ जवाफ दिएका थिए ।
आइतबार ट्रम्प इन्टरनेसनल गल्फ कोर्सको झाडीबाट बाहिर निस्केको राइफलको ब्यारेललाई अमेरिकी सिक्रेट सर्भिसका एक एजेन्टले देखेपछि राउथलाई पक्राउ गरिएको थियो ।
प्रहरीका अनुसार राउथ एउटा सवारीमा भागे र केही समयपछि उनलाई पक्राउ गरियो ।
अधिकारी रिक ब्राडशाका अनुसार प्रहरीले घटनास्थलबाट एउटा स्कोप, दुई ब्याकप्याक र एक गोप्रो क्यामेराले सुसज्जित एउटा ‘एके–४७–स्टाइल’ राइफल बरामद गरेको थियो ।
अमेरिकी सञ्चारमाध्यमका अनुसार उनी नियमित रूपमा सामाजिक सञ्जालमा राजनीति र वर्तमान घटनाका बारेमा पोस्ट गर्दथे । ति पोष्टहरुमा ट्रम्पको आलोचना पनि समावेश थिए ।
