दोश्रो स्विंग राज्य जर्जियामा पनि ट्रम्प विजयी
प्रकाशित मिति : कार्तिक २१, २०८१ बुधबार
अमेरिकाका सात स्विंग राज्यहरूमध्ये दुईमा पूर्व राष्ट्रपति रिपब्लिकन पार्टीका उम्मेदवार डोनाल्ड ट्रम्पले जीत हात पार्नुभएको छ ।
ट्रम्पले नर्थ क्यारोलाइना र जर्जियामा विजय प्राप्त गर्नुभएको हो । यी दुवै राज्यमा १६।१६ इलेक्टोरल भोट छन्।
सात स्विंग राज्यहरूमध्ये पाँच राज्यका नतिजा आउन अझै बाँकी छन् । प्रारम्भिक गणना अनुसार ती सबै पाँच राज्यहरूमा पनि ट्रम्पले अग्रता कायम गरिरहनु भएको छ ।
स्विंग राज्यहरू ती राज्यहरूलाई भनिन्छ, जहाँ चुनावमा हार वा जीत धेरै नै कम अन्तरले हुने गर्छ।
एरिजोना, जर्जिया, मिशिगन, नेभाडा, नर्थ क्यारोलाइना, पेन्सिलभेनिया, र विस्कन्सिनलाई अमेरिकामा स्विंग राज्यहरूको नामले चिनिन्छ ।
अमेरिकाको अलास्का र हवाई राज्यबाहेक अन्य सबै राज्यहरूमा मतदान सम्पन्न भइसकेको छ । अहिले मतगणना जारी छ।
अहिलेसम्मको प्रक्षेपणले ट्रम्पसँग २४६ इलेक्टोरल भोट छन् भने कमला ह्यारिससँग १८७ इलेक्टोरल भोट रहेका छन्।
जीतका लागि ५३८ मध्ये २७० भोटको आवश्यकता पर्छ।
