मेटाले भन्यो : सन २०२४ चुनावी वर्ष बन्यो , तर एआईले प्रभाव पारेन
प्रकाशित मिति : मंसिर १८, २०८१ मंगलबार
एआईले सन् २०२४ मा चुनावलाई प्रभावित गरेको कुनै सङ्केत नभेटिएको मेटाले बताएको छ ।
कृत्रिम बुद्धिमत्ता (आर्टिफिसियल इन्टेलिजेन्स– एआई) ले विश्वभरका मतदाताहरूलाई भ्रमित गर्न सञ्चार माध्यममा झुटो सूचना ल्याउँछ भन्ने डर सत्य साबित नभएको बताएको हो ।
मेटा ग्लोबल अफेयर्सका अध्यक्ष निक क्लेगले पत्रकारहरूलाई कम्पनीको प्लेटफर्ममा भ्रामक प्रभाव अभियानविरुद्ध सुरक्षा मजबुत रहेको र त्यस्ता समन्वित प्रयासहरूले अनलाइनमा ध्यान आकर्षित नगरेको बताउनुभयो ।
मेटाका अनुसार यसले हालै अवरुद्ध गरेका अधिकांश प्रभाव अभियानहरू रुस, इरान र चीनका कर्ताहरूद्वारा सञ्चालित थिए ।
जेनेरेटिभ एआई उपकरणहरू झन् परिष्कृत र व्यापक हुने अपेक्षा गरिएकाले मेटाको आफ्नो सतर्कता कम गर्ने कुनै मनसाय नभएको बताइएको छ ।
क्लेगले सन् २०२४ लाई अहिलेसम्मको सबैभन्दा ठूलो चुनावी वर्ष भन्नुभयो । यो वर्ष विश्वभरका धेरै देशमा करिब दुई अर्ब मानिसले मतदान गरेको अनुमान गरिएको छ ।
मेटाका मुख्य कार्यकारी मार्क जुकरबर्ग र राष्ट्रपति–निर्वाचित डोनाल्ड ट्रम्पले गएको साता ट्रम्पको फ्लोरिडा रिसोर्टमा मेटाको सामग्री नियन्त्रण नीतिबारे छलफल गरेको अनुमान गरिएको छ ।
प्लेटफर्मले राजनीतिक रूपमा रूढीवादी दृष्टिकोणलाई सेन्सर गरेको आरोप लगाउँदै ट्रम्पले मेटाको आलोचना गर्नुभएको छ ।
