जनवरी ६ को दंगामा संलग्नलाई पहिलो दिनमै आममाफी दिने ट्रम्पको वाचा
प्रकाशित मिति : मंसिर २४, २०८१ सोमबार
नवनिर्वाचित अमेरिकी राष्ट्रपति डोनाल्ड ट्रम्पले जनवरी ६ को दंगामा संलग्नहरुलाई आममाफी दिने वाचा गरेका छन् । चुनावमा विजयी भएपछिको पहिलो टेलिभिजन अन्तर्वार्तामा ट्रम्पले आप्रवासन, स्वास्थ्य सेवा, र न्याय विभागका लागि आफ्ना योजनाहरू समेट्दै आफ्ना चुनावी वाचाहरूबारे छलफल गर्ने क्रममा आममाफी दिने बताएका हुन् ।
जनवरी ६ का घटनामा संलग्न व्यक्तिहरूको क्षमादानबारे कुरा गर्दै ट्रम्पले आफ्नो पहिलो दिनमै उनीहरूलाई क्षमा गर्ने वाचा गरेका छन् । जेलका अवस्थाहरूको आलोचना गर्दै उनले दोषी ठहरिएका व्यक्तिहरूले अरू कुनै विकल्प नभएर दोष स्वीकार गरेको तर्क गरे। ट्रम्पले यो प्रणालीलाई बुझेको र धेरै भ्रष्ट भएको बताउदै आफुले सबै कुरा हेर्ने र हरेक मुद्दालाई व्यक्तिगत रूपमा अध्ययन गर्ने बताएका छन् ।
जनवरी ६ घटनासँग सम्बन्धित १,५०० भन्दा बढी मानिसहरू पक्राउ परेका वा आरोपित भएका छन्, जसमध्ये करिब ९०० जनाले दोषी स्वीकार गरेका छन् । ट्रम्पले आफ्नो चुनावी अभियानका मुख्य विषयहरू मध्ये एकका रूपमा जनवरी ६ मा संलग्न कैदीहरूलाई मुक्त गर्ने वाचा गरेका थिए।
क्षमा दिनेबारेको वाचासँगै ट्रम्पले आफ्नो भावी प्रशासनका लागि डिपार्टमेन्ट अफ जस्टिस र एफबीआईका निर्देशकका रूपमा पाम बन्डी र काश पटेललाई रोज्ने सोचबारे पनि मिश्रित टिप्पणी गरेका छन् ।
डिपार्टमेन्ट अफ जस्टिसका अधिकारीहरूलाई आफ्ना राजनीतिक प्रतिद्वन्द्वीहरूविरुद्ध कदम चाल्न निर्देशन दिनेबारेको प्रश्नमा ट्रम्पले उनीहरू अनुभवी भएको तथा उनीहरूले गर्न चाहेको कुरा गर्न पाउने तर आफूले उनीहरूलाई निर्देशन नदिने बताए ।
काश पटेलले लामो समयदेखि मिडिया, डिपार्टमेन्ट अफ जस्टिस र डेमोक्र्याटिक नेताहरू विशेष गरी राष्ट्रपति जो बाइडेन र हिलारी क्लिन्टनविरुद्ध जाँचबुझको माग गर्दै आएका छन्। ट्रम्पले प्रत्यक्ष रूपमा उनीहरूलाई कदम चाल्न निर्देशन नदिने भए पनि उनीहरूलाई स्वतन्त्र निर्णय गर्न छुट दिने कुरा भने प्रस्ट पारेका छन् ।
यसैबीच राष्ट्रपति जो बाइडेनले ट्रम्पको धम्की र योजनाहरूलाई ध्यानमा राख्दै केही व्यक्तिहरूलाई अग्रिम रुपमा नै क्षमादान दिन सक्नेबारे सोचिरहेका छन्। यी व्यक्तिहरूमा जनवरी ६ को जाँच समितिमा संलग्न लिज चेनी र एडम शिफ्ट साथै डाक्टर एन्थोनी फाउची पनि छन्। ट्रम्पले बाइडेनको संभावित क्षमादानबारे प्रतिक्रिया दिँदै बाइडेनले चाहेमा क्षमादान दिन सक्ने बताएका छन् ।