जनवरीमा अमेरिकामा परिवारमा आधारित ग्रिनकार्ड फाइल गर्ने मितिमा भएन हलचल, प्रतिक्षा अवधि बृद्धि
प्रकाशित मिति : मंसिर २५, २०८१ मंगलबार
जनवरीमा परिवारमा आधारित कुनै पनि श्रेणीको ग्रिनकार्ड फाइल गर्ने मिति टसमस नभएपछि परिवारमा आधारित ग्रिनकार्ड कुरेर बसिरहेकाहरु थप निराश भएका छन् । अमेरिकी विदेश मन्त्रालय ब्यूरो अफ कन्सुलर अफेयर्सले सार्वजनिक गरेको भिसा बुलेटिन अनुशार जनवरीमा परिवारमा आधारित कुनै पनि श्रेणीको ग्रिनकार्ड फाइल गर्ने मितिमा कुनै फेरबदल भएको छैन । अर्थात् डिसेम्बरकै भिसा बुलेटिनको फाइल गर्ने मिति जनवरीका लागि समेत कपिपेष्ट गरिएको छ ।
अमेरिकाभित्र हुने ग्रिनकार्डवाहकका दम्पत्ति र २१ बर्षभन्दा कम उमेरका छोराछोरीहरुका लागि ग्रिनकार्ड फाइल गर्ने मिति गतबर्षको अगस्तसम्म कन्करेन्ट रहदै आएकोमा गतबर्षको सेप्टेम्बरदेखि भने कन्करेन्ट छैन । अथात् अमेरिकाभित्रै हुने ग्रिनकार्डवाहकका दम्पत्ति र २१ बर्षभन्दा कम उमेरका छोराछोरीहरुले आई १३० पिटिसन र ग्रिनकार्ड आवेदन आई ४८५ एकसाथ भने फाइल गर्न पाउँदैनन् ।
अमेरिकाभित्र हुनेहरुका सन्दर्भमा १ सेप्टेम्बर २०१७ भन्दा अगाडि प्राथमिकता मिति भएका अमेरिकी नागरिकका अविवाहित छोराछोरी, १५ जुलाई २०२४ भन्दा अगाडि प्राथमिकता मिति भएका ग्रिनकार्डवाहकका दम्पत्ति र २१ बर्ष नपुगेका छोराछोरी, १ जनवरी २०१७ भन्दा अगाडि प्राथमिकता मिति भएका ग्रिनकार्डवाहकका २१ बर्ष नाघेका अविवाहित छोराछोरी, २२ जुलाई २०१२ भन्दा अगाडि प्राथमिकता मिति भएका अमेरिकी नागरिकका विवाहित छोराछोरी र १ मार्च २००८ भन्दा अगाडि प्राथमिकता मिति भएका अमेरिकी नागरिकका दाजुभाई दिदीबहिनीहरुले जनवरीमा ग्रिनकार्ड आवेदन आई ४८५ फाइल गर्न पाउनेछन् । युएससीआईएसले पनि भिसा बुलेटिनको यही मितिलाई नै ग्रिनकार्ड आवेदन फाइल गर्ने मितिका रुपमा स्वीकार गरेको छ ।
अमेरिकाबाहिर हुनेहरुका सन्दर्भमा २२ नोभेम्बर २०१५ भन्दा अगाडि प्राथमिकता मिति भएका अमेरिकी नागरिकका अविवाहित छोराछोरी, १ जनवरी २०२२ भन्दा अगाडि प्राथमिकता मिति भएका ग्रिनकार्डवाहकका दम्पत्ति र २१ बर्ष नपुगेका छोराछोरी, २२ मे २०१६ भन्दा अगाडि प्राथमिकता मिति भएका ग्रिनकार्डवाहकका २१ बर्ष नाघेका अविवाहित छोराछोरी, १ जुलाई २०१० भन्दा अगाडि प्राथमिकता मिति भएका अमेरिकी नागरिकका विवाहित छोराछोरी र १ अगस्त २००७ भन्दा अगाडि प्राथमिकता मिति भएका अमेरिकी नागरिकका दाजुभाई दिदीबहिनीहरुले जनवरीमा अमेरिकी दूतावासहरुमा आप्रवासी भिसाका लागि अन्तरवार्ताको मिति पाउन सक्नेछन् । अहिले अमेरिकाबाहिर प्रतिक्षा गर्ने ग्रिनकार्डवाहकका दम्पत्ति र २१ बर्षभन्दा कम उमेरका छोराछोरीहरुका लागि भिसा अप्वाइन्टमेन्ट पाउन लाग्ने अवधि ३ बर्ष रहेको छ ।
फाइनल एक्सन डेट अमेरिकी दूतावासहरुमा आप्रवासी भिसाका लागि अन्तरवार्ताको मिति पाउनसक्ने अवधि अर्थात् अमेरिकी नागरिकका अविवाहित छोराछोरीका तुलनामा अघिल्लो महिनाको तुलनामा १ महिना सरेको छ भने ग्रिनकार्डवाहकका २१ बर्ष नाघेका अविवाहित छोराछोरीका सन्दर्भमा २२ दिन सरेको छ । त्यस्तै अमेरिकी नागरिकका विवाहित छोराछोरीका सन्दर्भमा साढे ३ महिना सरेको छ । तर ग्रिनकार्डवाहकका दम्पत्ति र २१ बर्ष नपुगेका छोराछोरी एवं अमेरिकी नागरिकका दाजुभाई दिदीबहिनीहरुका सन्दर्भमा भने यो मितिमा कुनै फेरबदल भएको छैन ।
उनीहरुको आवेदन युएससीआईएसबाट स्वीकृत भइसकेको खण्डमा भने फाइलिंग डेटका आधारमा उक्त आवेदन नेशनल भिसा सेन्टरले डकुमेन्ट्री क्वालीफाइड हुनका लागि प्रकृया अगाडि बढाउँछ । तर भिसा अन्तरवार्ताका लागि भने भिसा बुलेटिनमा रहेको फाइनल एक्सन डेट नै प्रतिक्षा गर्नुपर्छ । युएससीआईएसले आई १३० आवेदन प्रकृयामा लैजान भने लामो समय लगाउने गरेको छ ।
जनवरीको भिसा बुलेटिन अनुशार अमेरिकी नागरिकका दाजुभाई दिदीबहिनीहरुलाई ग्रिनकार्ड पाउन लाग्ने अवधि १७ बर्ष ४ महिना पुगेको छ । अमेरिकी नागरिकका दाजुभाई दिदीबहिनीहरुलाई ग्रिनकार्ड पाउन लाग्ने अवधि बढेको बढ्यै रहेको छ । जसका कारण सन् २००७ भन्दा पछाडि आई १३० आवेदन दिएका अमेरिकी नागरिकका दाजुभाई दिदीबहिनीहरुले आप्रवासी भिसा पाउन सकेका छैनन् । लामो समयको प्रतिक्षा अवधिका कारण भिसा कुरेर बसेका उनीहरु निराश भएका छन् ।
जनवरीको भिसा बुलेटिन अनुशार अमेरिकी नागरिकका २१ बर्ष काटेका अविवाहित छोराछोरीहरुका लागि भिसा पाउन लाग्ने अवधि ९ बर्ष २ महिना रहेको छ ।ग्रिनकार्डवाहकका २१ बर्ष काटेका अविवाहित छोराछोरीहरुका लागि भिसा पाउन लाग्ने अवधि ८ बर्ष ७ महिना रहेको छ । अमेरिकी नागरिकका विवाहित छोराछोरीहरुका लागि भिसा पाउन लाग्ने अवधि १४ बर्ष ५ महिना रहेको छ ।
