भानुआटुमा भूकम्प : अमेरिकाद्धारा सहयोगको प्रतिबद्धता
प्रकाशित मिति : पुस ३, २०८१ बुधबार
टापुहरुको समूह भानुआटुमा गएको भूकम्पका कारण अमेरिकी दुतावासमा क्षति पुगेको छ ।
त्यहाँको प्रहरीका अनुसार अमेरिकासहित फ्रान्स, बेलायत र न्युजिल्यान्डका दूतावासहरूमा भूकम्पले क्षति पुराएको हो ।
विद्युत् आपूर्ति र मोबाइल सेवा पनि प्रभावित भएका छन् । ७.३ म्याग्निच्युडको शक्तिशाली भूकम्पपछि रातभर पराकम्पनहरू गएका छन ।
संयुक्त राष्ट्रसंघीय मानवीय सहायता समन्वय कार्यालयका अनुसार भूकम्पको सबैभन्दा खराब असरले करिब १ लाख १६ हजार मानिस प्रभावित हुन सक्ने संभावना रहेको छ ।
छिमेकी अष्ट्रेलियाले खोज तथा उद्धार कार्यमा मद्दत गर्न टोली पठाउने घोषणा गरेको छ । अमेरिका र फ्रान्सले पनि सहयोगको प्रतिबद्धता जनाएका छन् ।
मृत्यु हुनेको संख्या चिनियाँ २ सहित १४ पुगेको छ । २ सय भन्दा बढि घाइते भएका छन । उद्धार टोलीहरू भग्नावशेषहरूमा जीवित मानिसहरूको खोजी गरिरहेका छन् ।
उद्धारकर्ताहरूले मानिसहरूलाई बचाउन ह्याम्मर, ग्रिन्डर, र कङ्क्रिट काट्ने उपकरणजस्ता साधन प्रयोग गरेका थिए । भानुआटु ८० वटा टापुहरूको समूह हो । फिजीको पश्चिम र उत्तर अष्ट्रेलियाको हजारौं किलोमिटर पूर्वमा अवस्थित छ ।
यो भौगर्भिक रूपमा सक्रिय क्षेत्रमा पर्दछ । जहाँ ठूला भूकम्प र अन्य प्राकृतिक प्रकोप बारम्बार हुने गर्छन् ।
