१३ वर्ष अमेरिकी सेनामा काम गरेका शम्सुद्दिन जब्बारको न्यु आर्लियन्स दुर्घटनामा संलग्नता
प्रकाशित मिति : पुस १८, २०८१ बिहीबार
नयाँ वर्षको दिन अमेरिकाको न्यु आर्लिन्समा १५ जनाको मृत्यु र दर्जनौं घाइते हुने गरि भएको ट्रक दुर्घटनामा ४२ वर्षीय टेक्सास निवासी शम्सुद्दिन जब्बारको संलग्नता पुष्टि भएको छ । उनले १३ वर्ष अमेरिकी सेनामा सेवा गरेको प्रहरी अनुसन्धानले देखाएको छ । उनी अमेरिकी सेनामा रहँदा अफगानिस्तानमा समेत खटिएका थिए ।
संघीय अधिकारीहरू र न्यु आर्लिन्सका स्थानीय कानुन कार्यान्वयन निकायका अनुसार जब्बार यो आक्रमणमा एक्लै संलग्न थिएनन् । अन्य सम्भावित सहयोगीहरूको खोजी भइरहेको छ । संघीय अनुसन्धान ब्यूरो (एफबीआई)का अनुसार जब्बारको ट्रकमा इस्लामिक स्टेट (आईएसआईएस) को झन्डा फेला परेको छ। यसलाई आतंकवादको सम्भावित कार्यका रूपमा अनुसन्धान गरिएको छ ।
अनुसन्धानले अहिलेसम्म आक्रमणको स्पष्ट उद्देश्य पत्ता लगाउन सकेको छैन् । प्रहरीका अनुसार घटनास्थलमै जब्बारको प्रहरीसँगको गोली हानाहानमा मृत्यु भएको थियो ।
जब्बारले २००७ देखि २०१५ सम्म मानव संसाधन र सूचना प्रविधि विशेषज्ञको रूपमा अमेरिकी सेनामा सेवा गरेका थिए । त्यसपछि उनले २०२० सम्म आरक्षित सेनामा आईटी विशेषज्ञको रूपमा काम गरेका थिए । जब्बारले २००९ को फेब्रुअरीदेखि २०१० को जनवरीसम्म अफगानिस्तानमा सेवा गरे । सेनामा प्रवेश गर्नुअघि उनी २००४ मा नौसेनामा भर्ती भएका थिए, तर एक महिनापछि छुट्टी लिएका थिए।
पछिल्ला केही वर्षमा जब्बारले आफुलाई कविभिन्न व्यवसायहरूमा संलग्नता देखाएका थिए । २०२० मा युट्युबमा पोस्ट गरिएको एक भिडियोमा उनले आफूलाई टेक्सासस्थित ब्लू मेडो प्रॉपर्टीज एलएलसीको प्रबन्धक र रियल इस्टेट एजेन्टका रूपमा चिनाएका थिए । भिडियोमा उनले आफ्नो सैन्य अनुभवले जिम्मेवारी र गम्भीरताका साथ काम गर्न सिकाएको बताएका थिए । जब्बार २०२२ मा पाँच वर्षे वैवाहिक सम्बन्धपछि पत्नीबाट अलग भएका थिए । उनीहरूका एक सन्तान रहेका छन्।
एफबीआईका अनुसार जब्बारले न्यू ऑरलिन्सको फ्रेन्च क्वार्टरमा भीडलाई ठक्कर दिन भाडामा लिएको फोर्ड पिकअप ट्रक प्रयोग गरेका थिए । घटनास्थलमा १५ जनाको मृत्यु भएको र ३५ जना घाइते भएका थिए । ट्रकभित्र हतियार, सम्भावित विस्फोटक सामग्री र अन्य सामग्री फेला परेको छ ।
एफबीआईका सहायक विशेष एजेन्ट अलेथेया डंकनका अनुसार यो घटनामा जब्बार मात्र संलग्न नरहेको र उनका सहयोगीहरूको खोजी तीव्र रूपमा भइरहेको छ ।
