हश मनी मुद्धामा ट्रम्पलाई १० जनवरीमा सजाय सुनाइने, कस्तो होला कारवाही ?
प्रकाशित मिति : पुस १९, २०८१ शुक्रबार
अमेरिकाका नवनिर्वाचित राष्ट्रपति डोनाल्ड ट्रम्पलाई न्यूयोर्कको हश मनी मुद्दामा १० जनवरीमा सजाय सुनाइने भएको छ । यो सजाय सुनाइने मिति उनले राष्ट्रपति पदमा सपथ खाने कार्यक्रमभन्दा दुई साताभन्दा कम समय अगाडि पर्नेछ ।
न्यूयोर्कका न्यायाधीश जुआन मर्चनले ट्रम्पलाई जेल सजाय, प्रोबेसन वा जरिवाना नदिई निर्विवाद छुट दिने संकेत गरेका छन् । उनले आफ्नो आदेशमा राष्ट्रपति निर्वाचित ट्रम्पले व्यक्तिगत रूपमा वा भर्चुअल रूपमा सुनुवाइमा उपस्थित हुन सक्ने बताएका छन् ।
ट्रम्पले राष्ट्रपतिको चुनावी जितको उपयोग गर्दै आफ्नो मुद्दा खारेज गराउन प्रयास गरेका थिए । उनको टोलीले न्यायाधीशको निर्णयको आलोचना गर्दै यसलाई कानूनविपरीत भएको भन्दै तुरुन्त खारेज गर्नुपर्ने माग गरेको छ ।
मे महिनामा ट्रम्पलाई व्यापारिक रेकर्ड नक्कली बनाएको ३४ फौजदारी अभियोगमा दोषी ठहर गरिएको थियो । यी आरोप पोर्न स्टार स्टर्मी ड्यानियल्सलाई मौन राख्न भुक्तानी गरिएको प्रकरणसँग सम्बन्धित थिए ।
यी आरोपहरू २०१६ को चुनावी अभियानको अन्तिम दिनमा उनका पूर्व वकिल माइकल कोहेनले पोर्न स्टारलाई चुप लाग्न रकम दिएको र यसको भुक्तानी लुकाउन खोजिएको अभियोगसँग सम्बन्धित रहेका बताइएको छ ।
राष्ट्रपति निर्वाचित ट्रम्पले सबै आरोप अस्वीकार गर्दै आफू निर्दोष रहेको र यो मुद्दा २०२४ को राष्ट्रपतिको चुनावी अभियानलाई क्षति पुर्याउन गरिएको दाबी गरेका छन् ।
शुक्रबार ट्रम्पका प्रवक्ताले न्यायाधीश मर्चनको आदेशको आलोचना गरेका छन । सजाय दिनु हुँदैन, र राष्ट्रपति ट्रम्प यी सबै झूटा मुद्दाहरूको अन्त्यसम्म लडिरहनेछन् उनले भनेका छन ।
न्यायाधीश मर्चनले ट्रम्पका मुद्दा राष्ट्रपतिको कार्यकालमा उनलाई बाधा पुर्याउने र शासकीय क्षमतामा प्रभाव पार्ने भन्दै उनलाई आश्वासन दिने केही विकल्पहरू प्रस्तुत गरेका थिए ।
यी विकल्पहरूमा २०२९ मा ट्रम्पले ह्वाइट हाउस छोडेपछि मात्र सजाय सुनाउने वा जेल सजाय समावेश नगर्ने ग्यारेन्टी दिने निर्णय सामेल थियो ।
ट्रम्प अहिले ह्वाइट हाउसमा प्रवेश गर्ने पहिलो दोषी फौजदारी अभियुक्त हुनेछन् । सजायपछि ट्रम्पले दोषी ठहरविरुद्ध पुनरावेदन गर्ने प्रयास गर्न सक्नेछन्।
व्यापारिक रेकर्ड नक्कली बनाउनु अमेरिकामा चार वर्षसम्मको जेल सजायको व्यवस्था रहेको भए पनि, न्यूनतम सजाय छैन र जेल सजाय अनिवार्य छैन ।
ट्रम्पलाई तीन अन्य राज्य र संघीय फौजदारी मुद्दाहरूमा पनि अभियोग लगाइएको छ । जसमा गोप्य कागजातहरू र २०२० को चुनावी नतिजा उल्टाउन गरेको प्रयास सम्बन्धी आरोपहरू सामेल छन् ।