अमेरिकाको टेक्सासदेखि क्यारोलिनासम्म हिमपात र अत्यधिक चिसो बढ्ने
प्रकाशित मिति : पुस २५, २०८१ बिहीबार
अमेरिकाको टेक्सास र अर्कान्ससदेखि क्यारोलिनासम्मको क्षेत्रका बासिन्दाले उल्लेखनीय जाडो मौसमको सामना गर्नुपर्ने देखिएको छ ।
मौसमविद्हरूले बिहीबार र शुक्रबार बाक्लो हिउँ र बरफ को भविष्यवाणी गरेका छन् । जसले यस हप्ता दक्षिणी क्षेत्रभरि समस्या सिर्जना गर्ने सम्भावना छ ।
टेक्सास र ओक्लाहोमाका दक्षिणी मैदानदेखि क्यारोलिना तटीय मैदानसम्म यो जाडो मौसमी प्रणालीले असर गर्नेछ ।
यस क्षेत्रमा बस्ने मानिसहरूलाई सडक दुर्घटना, बिजुली आपूर्ति अवरोध र विद्यालयहरू बन्द हुने अवस्था सिर्जना गर्न सक्ने सम्भावना छ ।
दक्षिणी अमेरिकामा सामान्यतः थोरै मात्राको हिउँ वा बरफले पनि जनजीवनमा अवरोध पुर्याउन सक्छ ।
बिहीबार बिहानै टेक्सासको उत्तरी भाग र ओक्लाहोमामा हिउँ पर्न सुरु भइसकेको थियो । यो आँधी मेक्सिकोको खाडीमा बनेर उत्तरपूर्वतर्फ सर्ने अपेक्षा गरिएको छ ।
भारी हिउँ प्रायः टेक्सास र ओक्लाहोमाको उत्तरी भागमा पर्ने सम्भावना छ ।
टेक्सासमा दुईदेखि चार इन्च हिउँ पर्न सक्ने अनुमान गरिएको छ । जुन इन्टरस्टेट २० को उत्तरमा पर्ने क्षेत्र हो । यो क्षेत्रमा सामान्यतः एक सिजनमा दुई इन्चभन्दा कम हिउँ पर्ने गर्दछ ।
डालासका विद्यालयहरू बिहीबार र शुक्रबार बन्द हुनेछन् । गभर्नर ग्रेग एबटले पत्रकार सम्मेलनमा चालकहरूलाई सचेत गराउँदै भने, “सावधानी अपनाउनुहोस् ।
हामीलाई हिउँ र बरफमा सवारी चलाउने बानी छैन । यस्तो अवस्थामा गाडी चलाउन हामी सक्षम छैनौं। ”
बिहीबारदेखि शुक्रबारसम्म आँधी मेक्सिकोको खाडी पार गर्दै उत्तरपूर्वतर्फ सर्नेछ । यसको बाटोमा हुने सानो परिवर्तनले विभिन्न स्थानमा फरक किसिमको मौसमी प्रणाली ल्याउन सक्ने अनुमान गरिएको छ ।
आँधीले पूर्वतटबाट बाहिर सर्दै बलियो हुनेछ । तर उत्तरपूर्वमा ठूलो असर पार्ने सम्भावना छैन । पूर्वतटमा असामान्य चिसो अर्को हप्ता पनि कायम रहनेछ ।