शान्ति वार्ताप्रति पुटिनको व्यवहार देखेर निराश बनिरहेको ट्रम्पको भनाई
प्रकाशित मिति : चैत्र १७, २०८१ आईतबार
अमेरिकी राष्ट्रपति डोनाल्ड ट्रम्पले रुसी समकक्षीको व्यवहार शान्ति वार्ताका लागि सहयोगी नभएको बताएका छन । उनले रुसी राष्ट्रपति भ्लादिमिर पुटिनको व्यवहारले आफुलाई क्रोधित र निराश बनाएको बताए ।
युक्रनी राष्ट्रपति भोलोदिमिर जेलेन्स्कीको विश्वसनीयतामाथि प्रश्न उठाएर पुटिनले शान्ति नचाहेको हो कि भन्ने संकेत गरेको ट्रम्पले आशंका गरे ।
रुस युक्रेन युद्ध रोक्नका लागि पहल गरिरहेका ट्रम्पको पुटिनसँगको आक्रोषले शान्ति वार्ता प्रति नै अन्यौलता देखाएको छ ।
उनले रुस शान्ति वार्ता प्रति उदासिन देखियो भने रुसबाट तेल किन्ने सबै देशका बिरुद्ध ५० प्रतिशत कर लगाउने चेतावनी दिए । रुसलाई शान्ति सम्झौताबाट भाग्न कुनै छुट नरहेको ट्रम्पले स्पष्ट रुपमा भनेका छन ।
युक्रेनसँग सम्झौता र रुससँग अधिकतम समझदारीको नीति लिएका ट्रम्प अन्तत रुसका विरुद्ध पनि आर्थिक प्रतिबन्धको धम्की दिने अवस्था कसरी पुगे भनेर विश्लेषकहरुले चासो व्यक्त गरेका छन ।
रूसले युद्ध रोक्ने सम्झौतामा सहमति जनाएन भने रूसको तेल र अन्य उत्पादनहरूमा २५ प्रतिशत कर लगाउने र यो कर एक महिना भित्र लागु हुने ट्रम्पले पुटिनलाई भनिसकेका छन ।
रुसको तेल किन्ने देशहरू चीन र भारतलाई पनि करको दायरामा ल्याउने उनले चेतावनी दिएका छन ।
जेलेन्स्कीले रुस अझै पनि युद्धलाई लम्ब्याउनको लागि बहाना खोजिरहेको आरोप लगाइरहेका छन । ट्रम्पले आगामी हप्ता पुटिनसँग कुराकानी गर्ने बताएका छन् ।
रूसले फेब्रुवरी २०२२ मा युक्रेनमा पूर्ण स्तरीय आक्रमण थालेको थियो । अहिले युक्रेनको २० प्रतिशत क्षेत्र रुसले नियन्त्रणमा राखेको छ ।
युद्धको चौथो वर्ष सम्ममा आइपुग्दा १ लाख भन्दा बढी रूसी सैनिक मारिएका छन् । ४३ हजार भन्दा बढी युक्रेनी सैनिकहरूको मृत्यु भएको अनुमान गरिएको छ ।