रुसद्वारा लगातार दोस्रो रात युक्रेनको उत्तर पूर्वी सहर खार्किभमा हमला
प्रकाशित मिति : चैत्र १८, २०८१ सोमबार
रुसले लगातार दोस्रो रात युक्रेनको उत्तरपूर्वी सहर खार्किभमा हमला गरेको छ। यस आक्रमणमा तीन जना घाइते भएका छन् भने औद्योगिक भवनहरूमा आगलागी भई दुई वटा बालविकास केन्द्रहरूमा क्षति पुगेको छ। युक्रेनी अधिकारीहरूले सोमबार बिहान यसबारे जानकारी दिएका छन्।
खार्किभका मेयर इहोर टेरेखोभका अनुसार आक्रमण रातभरि जारी रह्यो र यसले सहरको सबैभन्दा ठूलो र पुरानो जिल्ला प्रभावित बनायो। “एउटा अनुसन्धान तथा उत्पादन कम्पनीका पाँच वटा औद्योगिक भवनहरू क्षतिग्रस्त भएका छन्,” उनले टेलिग्राममार्फत जानकारी दिएका छन्।
आपतकालीन सेवाका अनुसार आक्रमणपछि लागेको आगो ३,९०० वर्ग मिटर क्षेत्रमा फैलिएको थियो। यसका साथै ड्रोन हमलाले ११ वटा अपार्टमेन्ट भवनहरूमा क्षति पुर्याएको छ।
यो हमला अमेरिकी मध्यस्थतामा भएको आंशिक युद्धविराम भएको एक सातापछि भएको हो। उक्त युद्धविरामले ऊर्जा र कालो सागरको संरचनाहरूमा हमला नगर्ने सम्झौता गरेको थियो। तर, दुबै पक्षहरूले एकअर्कालाई सम्झौता उल्लंघन गरेको आरोप लगाएका छन्।
युक्रेनी हवाई सेनाले रुसले रातभरमा १३१ ड्रोन प्रक्षेपण गरेको र त्यसमध्ये ५७ ड्रोन युक्रेनी सेनाले खसालेको जनाएको छ । साथै, दुईवटा इस्कान्दर(एम ब्यालिस्टिक क्षेप्यास्त्र पनि प्रयोग गरिएका थिए।
युक्रेनका राष्ट्रपति भोलोदिमिर जेलेन्स्कीले आइतबार भने, “रुसले पछिल्लो सातामा १,००० भन्दा बढी ड्रोन प्रहार गरेको छ। हामी यसबारे अमेरिका तथा अन्य सहयोगी राष्ट्रहरूको ठोस प्रतिक्रिया चाहन्छौं।”
शनिबारको रुसी ड्रोन हमलामा खार्किभमा दुई जनाको मृत्यु भएको थियो भने ३५ जना घाइते भएका थिए। खार्किभ क्षेत्रका गभर्नर ओलेह सिनेहुबोभका अनुसार आइतबार कुपिआन्स्क सहरमा निर्देशित हवाई बम आक्रमण हुँदा पाँच जना घाइते भएका थिए र एउटा अपार्टमेन्ट भवन क्षतिग्रस्त भएको थियो।
कुपिआन्स्क, जुन खार्किभको पूर्वमा पर्छ । रुसी सेनाले युद्धको सुरुवातमै नियन्त्रणमा लिएको थियो। तर, पछि युक्रेनी सेनाले पुनः कब्जा जमाएको थियो। अहिले यो सहर फेरि रुसी दबाबमा परेको छ।
