गाजा खाली गराउने ट्रम्पको प्रस्ताव विरुद्ध लड्न हमासको आव्हान
प्रकाशित मिति : चैत्र १८, २०८१ सोमबार
अमेरिकी राष्ट्रपति डोनाल्ड ट्रम्पले अगाडी सारेको गाजा योजनाविरुद्ध लड्न प्यालेस्टाइन लडाकु समूह हमासले आह्वान गरेको छ ।
हमासका वरिष्ठ अधिकारीले विश्वभरका समर्थकलाई राष्ट्रपति डोनाल्ड ट्रम्पको योजना बिरुद्ध प्रतिरोध गर्न आव्हान गरेका हुन ।
ट्रम्पले २० लाखभन्दा बढी गाजावासीलाई इजिप्ट र जोर्डनजस्ता छिमेकी देशमा स्थानान्तरण गर्ने योजना प्रस्ताव गरेका छन ।
वरिष्ठ नेता सामी अबु जुहारीले विज्ञप्ति जारी गर्दै नरसंहार र भोकमरीको संयोजन गर्ने यो कुटिल योजनाको सामना गर्न आव्हान गरेका हुन ।
इजरायली प्रधानमन्त्री बेन्जामिन नेतन्याहूले हमासका नेताहरूलाई गाजा छोड्न दिने प्रस्ताव गरेको एक दिनपछि अबु जुहरीले यो आह्वान गरेका हुन ।
तर गाजामा युद्धको अन्तिम चरणमा प्यालेस्टिनी लडाकू समूहलाई निःशस्त्रीकरण गर्न नेतन्याहूले माग गरे ।
नेतन्याहूले गाजावासीलाई अन्य देशमा विस्थापित गर्ने ट्रम्पको योजनाका लागि इजरायलले काम गरिरहेको समेत बताए ।
नेतन्याहूले युद्धपछि इजरायलले गाजामा समग्र सुरक्षा सुनिश्चित गर्ने उल्लेख गरे । उनले ट्रम्प योजनाको कार्यान्वयनलाई सक्षम बनाउने भन्दै यसलाई ‘स्वैच्छिक आप्रवासन योजना’ को संज्ञा दिए ।
गत जनवरीमा पदभार ग्रहण गरेको केही दिनपछि ट्रम्पले गाजाबाट गाजावासीलाई हटाउन प्रस्ताव गरेका थिए । तर अरब राष्ट्रहरूसहित विश्व समुदायबाट ट्रम्पको प्रस्तावको विरोध भएको छ ।