ट्रम्पको आप्रवासन नीतिको अमेरिकामै विरोध
प्रकाशित मिति : चैत्र १८, २०८१ सोमबार
अमेरिकाको डलासमा ट्रम्पको आप्रवासन नीतिको विरोधमा प्रदर्शन भएको छ । प्रदर्शनकारीले आप्रवासन अधिकारीद्वारा नियन्त्रणमा लिएका विद्यार्थीको रिहाइको माग गरेका थिए ।
ट्रम्पले आप्रवासन नीतिलाई संसोधन गरी जन्मसिद्ध नागरिकतालाई हटाउने प्रयास गरेपछि अमेरिकी प्राज्ञहरूलेसमेत यसलाई असंवैधानिक निर्णय भनेका छन् ।
राष्ट्रपति डोनाल्ड ट्रम्पको आप्रवासन नीतिप्रति असन्तुष्टि जनाउँदै डलासमा विरोध प्रदर्शन भएको हो ।
सिएनएनका अनुसार विरोधमा सहभागीहरूले एकता र देशभक्तिको प्रतीकको रूपमा अमेरिकी झण्डा बोकेका थिए । केहीले महमुद खलिल, खान सूरी र रुमेसा ओजतुर्कका प्रतीक बोकेका थिए ।
ट्रम्प सरकारले आतङ्कवादी सङ्गठनसँग सम्बन्धित गतिविधिको आरोपमा केही विद्यार्थीलाई गिरफ्तार गरेको विरोधमा भएको प्रदर्शनमा व्यापक सहभागिता देखिन्थ्यो ।
‘लिग अफ युनाइटेड ल्याटिन अमेरिकन सिटिजन्स’का पूर्व राष्ट्रिय अध्यक्ष हेक्टर फ्लोर्सले विरोध प्रदर्शनलाई सम्बोधन गर्दै वास्तुकला, कला, खाना, स्वास्थ्य सेवा, शिक्षा र विज्ञान लगायत विभिन्न क्षेत्रमा ल्याटिनहरूको योगदानबारे चर्चा गरेका थिए ।
राष्ट्रपति ट्रम्पले आफनो दोस्रो कार्यकाल सुरु गरेपछि अमेरिकामा रहेका आप्रवासिहरु विरुद्ध कडा कदम चालिरहेका छन ।
कागजातविहिन र विभिन्न आपराधिक कृयाकलापमा सम्लग्नहरुलाई पक्राउ गरि धमाधम डिर्पोट गरिएको छ । कतिपयलाई स्थानीय जेलहरुमा राखिएको छ ।